ރ. މަޑުއްވަރީގައި ބިދޭސީ އަންހެނަކަށް ހަމަލާދީ، އޭނާގެ އަތުން ފޭރެން އުޅުނު މައްސަލައެއްގައި 24 އަހަރުގެ ނޭޕާލް ފިރިހެނަކު ފުލުހުން ހައްޔަރުކޮށްފިއެވެ.
މި ހާދިސާގެ ވީޑިއޯއެއް މިދިޔަ ހުކުރު ދުވަހު ސޯޝަލް މީޑިއާގައި އާންމުވެފައިވާއިރު، އޭގެއިން ފެންނަނީ ބިދޭސީ ފިރިހެނަކު އެ އަންހެން މީހާގެ އަނގަމަތީގައި އަތްއަޅައި، އޭނާގެ ގައިމައްޗަށް އަރައިގެން އިންނަ މަންޒަރެވެ. އެ މަންޒަރު ވީޑިއޯ ކުރި ދިވެހި ފިރިހެނަކު ވަނީ އެ މީހާ ހުއްޓުވައިފައެވެ. އަދި އެ ސަރަހައްދު މަގުމައްޗަށް ގިނަ އަދަދެއްގެ ފައިސާ އުކާލެވިފައި ހުރިއިރު، ފަހުން އެ އަންހެން މީހާ އެ ފައިސާތައް ނަގާ ތަން ވެސް ވީޑިއޯއިން ފެނެއެވެ.
އެނގިފައިވާ ގޮތުގައި އަނިޔާވި އަންހެން މީހާއަކީ މަޑުއްވަރީ ކެފޭއެއްގައި މަސައްކަތްކުރާ ނޭޕާލް އަންހެނެކެވެ. އަދި ހައްޔަރުކުރި ފިރިހެން މީހާއަކީ އެ ރަށުގައި ގަވާއިދާ ހިލާފަށް އުޅެމުންދިޔަ މީހެކެވެ.
ފުލުހުން މަޢުލޫމާތު ދިން ގޮތުގައި، ކޯޓު އަމުރެއްގެ ދަށުން މި ފިރިހެން މީހާ ހައްޔަރުކުރީ ހޮނިހިރު ދުވަހުއެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ 5 ދުވަހުގެ ބަންދުގެ މުއްދަތެއް ދީފައެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
