އެމެރިކާއާއި އީރާނާ ދެމެދު އުފެދިފައިވާ މައްސަލަތައް ޙައްލުކުރުމަށް ޕާކިސްތާނުން ކުރަމުންދާ ޑިޕްލޮމެޓިކް މަސައްކަތްތަކަށް ޔޫރަޕިއަން ޔޫނިއަންގެ އިސް ލީޑަރުން މަރުޙަބާ ވިދާޅުވެއްޖެއެވެ.
އދ. ގެ ޢާންމު މަޖިލީހުގެ ހަވާސާގައި، ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި، ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ އަދި ޔޫރަޕިއަން ކޮމިޝަންގެ ރައީސް އުރުސުލާ ވޮން ޑަ ލޭޔެން ވަނީ ބައްދަލުކުރައްވައި މަޝްވަރާ ކުރައްވާފައެވެ.
މި ބައްދަލުވުމަށްފަހު އެކްސްގައި ވަކިވަކިން ކުރެއްވި ޕޯސްޓްތަކެއްގައި އީޔޫގެ ދެ ލީޑަރުން ވިދާޅުވީ، މަސްރަޙު ފިނިކުރުމަށާއި، ވާހަކަދެއްކުމަށާއި، އަދި ހަމަނުޖެހުންތައް ޞުލްޙަވެރިކަމާއެކު ޙައްލުކުރުމަށް އެހީތެރިވުމުގައި ޕާކިސްތާނުން "މުހިންމު ދައުރެއް އަދާކުރަމުންދާ" ކަމަށެވެ. އަދި "ހަމަޖެހުމާއި ސަލާމަތަށްޓަކައި އަޅުގަނޑުމެން އެކުގައި މަސައްކަތް ކުރަމުންދާ" ކަމަށްވެސް އެ ބޭފުޅުން ވިދާޅުވިއެވެ.
މީގެއިތުރުން، އެމެރިކާއާއި އީރާނާ ދެމެދު އުފެދިފައިވާ މައްސަލަ ޙައްލުކުރުމަށް ޞުލްޙައިގެ މެދުވެރިއެއްގެ ދައުރު އަދާކުރުމަށް ބޮޑުވަޒީރު އިސްނެންގެވި އިސްނެންގެވުމަށް އީޔޫގެ ލީޑަރުން ވަނީ ޝުކުރު އަދާކުރައްވާފައެވެ.
ޕާކިސްތާނުގެ ބޮޑުވަޒީރުގެ އޮފީހުން ނެރުނު ބަޔާނެއްގައި ވާގޮތުން، މި ބައްދަލުވުމުގައި ލީޑަރުން ވަނީ ސަރަޙައްދީ އަދި ދުނިޔޭގެ މުހިންމު ކަންކަމާމެދު ޚިޔާލު ބަދަލުކުރައްވާފައެވެ. އަދި ވާހަކަދެއްކުމާއި، ޑިޕްލޮމަސީއާއި، ބައިނަލްއަޤްވާމީ ޤާނޫނުތަކާއި، އަދި ދެބަސްވުންތައް ޞުލްޙަވެރިކަމާއެކު ޙައްލުކުރުމުގެ މުހިންމުކަން އެ ބޭފުޅުން ވަނީ އަލުން ކަށަވަރުކުރައްވާފައެވެ.
