އެމެރިކާއިން އެއާލައިންތަކަށް އެޅި އައު ދަތިކުރުމުގެ ފިޔަވަޅުތަކާ ގުޅިގެން، އީރާނުން ވަނީ އދ. ގެ އާންމު މަޖިލީހުގައި ވަރުގަދަ ރައްދެއް ދީ، އެ ފިޔަވަޅުތައް ތަންފީޒުކުރާ ޤައުމުތަކަށް އިންޒާރު ދީފައެވެ.
އީރާނުގެ ރައީސް މަސްޢޫދު ޕެޒެޝްކިއާން ވިދާޅުވީ އެމެރިކާއިން ބާރުގެ ބޭނުންކޮށްގެން ބިރުދައްކަމުންދާ ކަމަށާއި، މި ފިޔަވަޅުތަކުގެ ސަބަބުން ގެއްލުން ލިބެނީ ނިކަމެތި އާންމު ރައްޔިތުންނަށް ކަމަށެވެ.
މީގެއިތުރުން، އީރާނުން ދުވަހަކުވެސް ބޯނުލަނބާނެ ކަމަށާއި ފިޔަވަޅުތަކާ ކުރިމަތިލުމުގައި ހިތްވަރު އިތުރުވާނެ ކަމަށް ވިދާޅުވިއެވެ. އަދި ބާރުގެ ބޭނުންނުކުރާނަމަ ޑިޕްލޮމެސީއާއި މަޝްވަރާއަށް އީރާން އަދިވެސް ތައްޔާރަށް އޮތް ކަމަށް ފާހަގަކުރެއްވިއެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުހުސިން ރިޒާއީ ވިދާޅުވީ، ޑިޕްލޮމަސީގެ އިތުރުން ނިންމުން ގެނުވާނެ ހަނގުރާމައަކަށް ވެސް އީރާން ތައްޔާރުވަމުންދާ ކަމަށެވެ.
ކަނޑުގެ މަގުން އަޅާފައިވާ ފިޔަވަޅުތައް އުވާލުމަށާއި، މުދާތައް ދޫކޮށްލުމުގެ އިތުރުން ޔަމަނުގެ ހަނގުރާމަ ހުއްޓާލުމަށް އީރާނުން ހުށަހަޅާ ޝަރުތުތައް، ޚާރިޖީ ވަޒީރު މެދުވެރިކޮށް ޤަތަރާއި ޕާކިސްތާނުގެ މެދުވެރިންނަށް ވަނީ ހިއްސާކޮށްފައެވެ.
އެމެރިކާއިން އީރާނުގެ އެއާލައިންތަކާ ދެކޮޅަށް އެޅި ފިޔަވަޅުތަކާ ގުޅިގެން ތުރުކީ، ޔޫއޭއީ އަދި ޗައިނާއިން ގިނަ ފްލައިޓްތައް ކެންސަލްކޮށްފައިވާއިރު، އޮމާން، އަޒަރުބައިޖާން އަދި ޖޯޖިއާއިން ވަނީ އެ ޤައުމުތަކުގެ ވައިގެ ސަރަހައްދު އީރާނުގެ ބޯޓުތަކަށް ބަންދުކޮށްފައެވެ.
