އައު އުސޫލުގެ ދަށުން، ކެޓަގަރީ "އޭ" ގައި ހިމެނޭ ރިސޯޓު ފަދަ ތަންތަނުން މަހަކު ލިބޭ ޖުމްލަ އާމްދަނީގެ 40 އިންސައްތަ މާރުކުރުން ލާޒިމުކޮށްފައިވާއިރު، ކެޓަގަރީ "ބީ" ގެ ގެސްޓްހައުސް ފަދަ ތަންތަނުން މާރުކުރަންޖެހެނީ ޒިޔާރަތްކުރާ ކޮންމެ ފަތުރުވެރިއަކަށް 25 ޑޮލަރުގެ ރޭޓުން ނުވަތަ ޖުމްލަ އާމްދަނީގެ 20 އިންސައްތައެވެ. އަދި ފަތުރުވެރިކަމުގެ ދާއިރާ ފިޔަވައި އަހަރަކު 25 މިލިއަން ޑޮލަރަށްވުރެ އިތުރަށް އާމްދަނީ ލިބޭ އެހެނިހެން ވިޔަފާރިތަކުން ޖުމްލަ އާމްދަނީގެ 40 އިންސައްތަ މާރުކުރަންޖެހޭއިރު، ސައްތައިން ސައްތަ ދިވެހި ވިޔަފާރިތަކުން މާރުކުރަންޖެހޭނީ އާމްދަނީގެ 7 އިންސައްތައެވެ.
މި ހުރިހާ ފައިސާއެއްވެސް އެމްއެމްއޭއިން ހުއްދަދީފައިވާ ބޭންކެއް މެދުވެރިކޮށް، އެ އޮތޯރިޓީން ކަނޑައަޅާފައިވާ ރަސްމީ ރޭޓުތަކުގައި މާރުކުރަންޖެހޭނެއެވެ. ރަސްމީ ރޭޓަށްވުރެ މަތީ އަގުތަކުގައި ޑޮލަރު ވިއްކުމާއި، ވިއްކަން އުޅުމުގެ އިތުރުން އެފަދަ ކަންކަން އިޝްތިހާރުކުރުން ވަނީ މަނާކޮށްފައެވެ. މި ގާނޫނާ ހިލާފުވާ އަމިއްލަ ފަރުދުން 25,000 ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއިރު، ކުންފުނިތަކާއި ވިޔަފާރިތައް އެއް ލައްކަ ރުފިޔާއާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.
