ގްރީންލޭންޑުގައި އެމެރިކާގެ އަސްކަރީ ބާރު ގާއިމުކުރުމަށާއި، އެމެރިކާއާ ދެކޮޅު ފަރާތްތަކުން އެ ރަށުގައި އަސްކަރީ މަރުކަޒުތައް ހެދުން މަނާކުރުމަށް އެމެރިކާ، ޑެންމާކް އަދި ގްރީންލޭންޑް ދެމެދު އެއްބަސްވުމެއްގައި ސޮއިކޮށްފައިވާ ކަމަށް ރައީސް ޑޮނަލްޑް ޓްރަމްޕް ވަނީ ހާމަކުރައްވާފައެވެ.
ޓްރަމްޕް ވިދާޅުވި ގޮތުގައި އެމެރިކާގެ ހުއްދަ ނެތި އެއްވެސް ދުޝްމަނަކަށް އެ ސަރަހައްދުގައި ނާޒުކު އިންވެސްޓްމަންޓްތަކެއް ނުކުރެވޭނެ ކަމަށާއި، މިއީ ވަކި މުއްދަތެއް ނެތް ގޮތަށް ހަމަޖެހިފައިވާ ދާއިމީ އެއްބަސްވުމެކެވެ.
ގްރީންލޭންޑާއި އެމެރިކާގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އެ ރަށުގައި ކުރަންޖެހޭ އެންމެހައި ކަންކަން ކުރުމުގެ ފުރިހަމަ އިޚްތިޔާރު އެމެރިކާއަށް ދާއިމީކޮށް ލިބިދޭނެ ގޮތަށް ޑެންމާކާއި ގްރީންލޭންޑުގެ މަންދޫބުންނާއެކު މަސައްކަތް ކުރައްވާފައިވާ ކަމަށް ޓްރަމްޕް ވިދާޅުވިއެވެ.
ނަމަވެސް، މި އެއްބަސްވުމަކީ ގްރީންލޭންޑް އެމެރިކާގެ ތަނެއްގެ ގޮތުގައި ހޯދުމަށް ޓްރަމްޕް ކުރިންސުރެ ދެކެވަޑައިގެންނެވި އަމާޒަށް ވާސިލުވެވުނު އެއްބަސްވުމެއް ނޫނެވެ.
މި އެއްބަސްވުމުގެ ސަބަބުން އުތުރު އެޓްލާންޓިކް އަދި އާކްޓިކް ސަރަހައްދުގެ ސަލާމަތާއި ރައްކާތެރިކަން ވަރުގަދަވެގެންދާނެ ކަމަށް ޑެންމާކުގެ ބޮޑުވަޒީރުގެ އޮފީހުން ވަނީ ހާމަކޮށްފައެވެ. އަދި ގްރީންލޭންޑުގެ ބޮޑުވަޒީރު ޔެންސް-ފްރެޑެރިކް ނީލްސަން ވިދާޅުވި ގޮތުގައި، މި އެއްބަސްވުމުގައި ގްރީންލޭންޑުގެ މަސްލަހަތުތަކާއި ބައިނަލްއަގުވާމީ ދައުރު ބަލައިގެންފައިވާތީ މީގެ ފައިދާ އެންމެންނަށް ކުރާނެއެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ މި އެއްބަސްވުމަކީ ސަލާމަތީ ކަންބޮޑުވުންތަކަށް ލިބުނު ދާއިމީ ހައްލެއްގެ ގޮތުގައި ފާހަގަކުރެއްވިއެވެ. މީގެއިތުރުން، ސްޓޭޓް ޑިޕާޓްމަންޓުން ހާމަކުރި ގޮތުގައި މި އެއްބަސްވުމުގެ ދަށުން ނޭޓޯއަށް ނިސްބަތްނުވާ ގައުމުތަކަށް ގްރީންލޭންޑުގައި އަސްކަރީ މަރުކަޒުތައް އެޅުން މަނާވާނެ ކަމަށާއި، ކުރިއަށް އޮތްތަނުގައި ގްރީންލޭންޑް މިނިވަންވި ނަމަވެސް މި އެއްބަސްވުން ދެމިއޮންނާނެއެވެ.
މި ލިޔުން ކިޔާލުމުން
