މަގުތަކުގައި ނުރައްކާތެރި ދުއްވާ އުޅަނދުތަކުގެ މައްސަލަ ހައްލުކުރަން އަޅަންޖެހޭ ފިޔަވަޅުތައް، ތަންފީޒީ އިދާރާތަކާ ގުޅިގެން އަޅާނެ ކަމުގެ ޔަގީންކަން މިނިސްޓަރު އަމީން ދެއްވައިފި.
މިފަހަކަށް އައިސް މާލެ އަދި ހުޅުމާލޭގައި ނުރައްކާތެރިކޮށް ދުއްވުމުގެ ސަބަބުން ހިނގާ އެކްސިޑެންޓްތަކުގެ އަދަދު އިތުރުވެފަވާ އިރު، ރޭ ދަންވަރު ހުޅުމާލެ ސެންޓްރަލް ޕާކް ކައިރީ ބާރު ސްޕިޑުގައި ދުއްވާފާ ދިޔަ ސައިކަލަކާ ކާރެއް ޖެހި ހިނގި އެކްސިޑެންޓުގައި ޒުވާނަކު ވަނީ ނިޔާ ވެފައެވެ.
އެކްސިޑެންޓްވި ކާރު ދުއްވަން އިން ސ. ހިތަދޫ ވައިލެޓްފެހި މުހައްމަދު ވިސާމް ސިދުގީ، 26 އަތުގައި ލައިސަންސް ނެތް ކަން ވެސް ފުލުހުން ވަނީ ހާމަކޮށްފައެވެ. އެ ހާދިސާއާ ގުޅުގެން ނުރައްކާތެރިކޮށް ދުއްވާ މީހުންނާ މެދު ހަރުކަށް ފިޔަވަޅު އަޅާ ގާނޫނުތަކާއި ގަވައިދުތަކަށް ގެންނަންޖެހޭ ބަދަލުތައް ގެނެސް ތަންފީޒު ކުރަން ފެށުމަށް ރައީސް ޑރ. މުހައްމަދު މުއިއްޒު ކަމާ ގުޅޭ އިދާރާތަކަށް މިއަދު ވަނީ އަންގަވައިފަ އެވެ.
މިނިސްޓަރު އަމީން ވިދާޅުވީ ރައީސް ދެއްވި އިރުޝާދާ އެއްގޮތަށް، މަގުތަކަކީ ރައްކާތެރި އަމާން ތަނަކަށް ހެދުމަށްޓަކައި ނުރައްކާތެރި ގޮތްގޮތަށް އުޅަނދު ދުއްވުމުގެ މައްސަލަ ހައްލުކުރުމަށް އަޅަންޖެހޭ ފިޔަވަޅުތައް އިދާރާތަކާ ގުޅިގެން މިނިސްޓްރީން އަޅާނެ ކަމަށެވެ.
އެ ހާދިސާގައި އަނިޔާވީ ސައިކަލު ދުއްވަން އިން އުމުރުން 23 އަހަރުގެ ހަސަން ސަމާހަށެ. މޯލްޑިވްސް ކަރެކްޝަނަލް ސާވިސްގައި ވަޒީފާ އަދާ ކުރަމުންދާ ސަމާހު ނިޔާވީ އެކްސިޑެންޓުގައި އޭނާގެ ބޮލަށް ލިބުނު އަނިޔާތަކުގެ ބޮޑުކަމުންނެވެ. އެނގިފައިވާ ގޮތުގައި ސަމާހު ނިޔާވީ ހޮސްޕިޓަލަށް ގެންދިޔަތާ ކުޑައިރުކޮޅެއް ފަހުންނެވެ.
މިދިޔަ މަހުގައި ވެސް ހުޅުމާލެ ދެވަނަ ފިޔަވަހީގައި ބާރު ސްޕީޑުގައ ދުއްވާފައި ދިޔަ ކާރެއް ކޮންޓްރޯލުން ނައްޓައިގެން ގޮސް ނުރައްކާތެރި އެކްސިޑެންޓެއް ހިނގާފާ ވެއެވެ.
މި ލިޔުން ކިޔާލުމުން
