ހޮރްމުޒް ކަނޑުއޮޅިން ދަތުރުކުރި އުޅަނދަކަށް ހަމަލާއެއް ދީފައިވާ ކަމުގެ ރިޕޯޓްތަކާ ގުޅިގެންނާއި، ސައޫދީ އަރަބިޔާއިން މުހިންމު ތެޔޮ ހޮޅިއެއް ބަންދުކުރުމާ ގުޅިގެން ދުނިޔޭގެ ބާޒާރަށް ތެޔޮ ފޯރުކޮށްދިނުމަށް ހުރަސްއެޅިދާނެ ކަމުގެ ކަންބޮޑުވުން ވަނީ އިތުރުވެފައެވެ.
ޔޫކޭއެމްޓީއޯ އިން ހާމަކުރި ގޮތުގައި އެ ކަނޑުއޮޅިން ދަތުރުކުރި އުޅަނދަކަށް އެއްޗެއް އަރައި ޖެހުނު ކަމުގެ މައުލޫމާތު ލިބިފައިވީ ނަމަވެސް، ލިބުނު ގެއްލުމުގެ ތަފުސީލާއި ފަޅުވެރިންގެ ހާލަތު އަދި ސާފެއް ނުވެއެވެ.
އީރާނުގެ ތާއީދު އޮންނަ ހަނގުރާމަވެރިން ދިން ކަމަށް ބެލެވޭ ޑްރޯން ހަމަލާއަކާ ގުޅިގެން، ރައްކާތެރިކަމުގެ ފިޔަވަޅެއްގެ ގޮތުން ސައޫދީގެ 1،200 ކިލޯމީޓަރުގެ ދިގު 'އީސްޓް-ވެސްޓް' ތެޔޮ ހޮޅި ވަގުތީ ގޮތުން ވަނީ ބަންދުކޮށްފައެވެ.
ހޮރްމުޒް ކަނޑުއޮޅި ބަންދުވެފައި އޮތް ފާއިތުވި ހަ މަސްދުވަހު ދުވާލަކު 4 އާއި 5 މިލިއަން ފީފާއާ ދެމެދުގެ އަދަދަކަށް ތެޔޮ ބޭރުކުރަމުން ދިޔަ މި ހޮޅިއަށް ގެއްލުންތަކެއް ލިބިފައިވާ ކަމަށް ސައޫދީން ކަށަވަރުކޮށްދީފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ މި ހަމަލާގެ ޒިންމާ ނަގަންޖެހޭނީ ބޮޑަށް ބެލެވޭ ގޮތުގައި އީރާނުން ކަމަށް ވިދާޅުވެފައެވެ.
ޔަމަނުގެ ހޫތީން ރަތްކަނޑުގެ ސަރަހައްދުގައި ކުރިއަރައި، ބާބުލް މަންދަބް ކަނޑުއޮޅީގައި އޮންނަ މުހިންމު ރަށެއް ކަމަށްވާ ޕެރިމް ހިފުމާ ގުޅިގެން، ސައޫދީގެ ވަލީއަހުދު މުހައްމަދު ބިން ސަލްމާން ވަނީ އެމެރިކާގެ އަސްކަރީ އެހީތެރިކަމަށް އެދިވަޑައިގެން ރައީސް ޓްރަމްޕަށް ގުޅުއްވާފައެވެ.
މަސްދަރުތަކުން ބުނާ ގޮތުގައި އެމެރިކާއިން ސީދާ އަސްކަރީ ގޮތުން މިކަމުގެ ތެރެއަށް ވަނުމުގެ ބަދަލުގައި އެހީތެރިކަން ފޯރުކޮށްދޭނީ ޖާސޫސީ މައުލޫމާތު މެދުވެރިކޮށެވެ. އަދި މި ހަމަނުޖެހުމުގެ ތެރެއަށް ސީދާ ގޮތެއްގައި ނުވަނުމަށް އެދި ހޫތީން ވެސް އެމެރިކާ ސަރުކާރަށް ގުޅާފައިވާ ކަމަށް ޓްރަމްޕް ވަނީ ވިދާޅުވެފައެވެ.
ހޮރްމުޒް ކަނޑުއޮޅީގެ މުސްތަގުބަލާ ގުޅޭގޮތުން އޮމާންގައި ބާއްވާ ބައްދަލުވުމުގައި އީރާނުން ބައިވެރިވާނެ ކަމަށް ބުނި ނަމަވެސް، އެމެރިކާއިން އީރާނުގެ ހުރިހާ ޝަރުތުތަކެއް ގަބޫލުނުކުރާހާ ހިނދަކު މަޝްވަރާތަކުން ބޮޑު ކުރިއެރުމެއް ލިބުމުގެ ފުރުސަތު ކުޑަކަމަށް އީރާނުގެ އިސް އޮފިޝަލުން ވަނީ ވިދާޅުވެފައެވެ.
އީރާނުގެ ޝަރުތުތަކުގެ ތެރޭގައި ކަނޑުއޮޅީގެ ކޮންޓްރޯލް ބަލައިގަތުމާއި އުޅަނދުފަހަރުގެ އަތުން ފީ ނެގުން ހިމެނޭއިރު، އެމެރިކާއިން މިކަންކަން ބަލައިނުގަންނާތީ މައްސަލަ ހައްލުވުމާމެދު ސުވާލު އުފެދިފައިވާއިރު، މި ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު ވަނީ ފީފާއެއް 100 ޑޮލަރަށްވުރެ މައްޗަށް އަރާފައެވެ.
މި ލިޔުން ކިޔާލުމުން
