އެ ރިސޯޓުގެ ފަރުތައް އާލާކުރުމަށް ކުރިއަށްގެންދިޔަ މި ހަރަކާތުގައި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުޙައްމަދު ޝަރީފްގެ އިތުރުން، ބޭންކުގެ އިސްވެރިންނާއި، މުވައްޒަފުން އަދި އެ ރިސޯޓުގައި ޗުއްޓީ ހޭދަކުރަމުންދިޔަ ފަތުރުވެރިން ވަނީ އަމަލީގޮތުން ބައިވެރިވެ މުރަކަ އިންދާފައެވެ.
ނިވަ ކުރުނބާ މޯލްޑިވްސްއަކީ ކަނޑުތައް ހިމާޔަތްކުރުމާއި ފަރުތައް އާލާކުރުމުގެ މަސައްކަތުގައި އާންމުން ބައިވެރިވުމުގެ ފުރުސަތު ފުޅާކޮށް ފޯރުކޮށްދެމުންދާ ރިސޯޓެކެވެ. މީގެ ކުރިންވެސް ބީއެމްއެލްއިން ވަނީ ރާއްޖޭގެ އެކި ހިސާބުތަކުގައި ފަރުތައް އާލާކުރުމުގެ މަޝްރޫއުތަކަށް އެހީތެރިކަން ފޯރުކޮށްދީފައެވެ. އޭގެ ތެރޭގައި ގދ. ވާދޫގައި ހިންގި "ވާދޫ އެސޯސިއޭޝަން ފޮ ފިއުޗާ ޑިވެލޮޕްމަންޓް" ގެ މަޝްރޫއާއި، ބ. ދަރަވަންދޫގައި ކުރިއަށްގެންދިޔަ "މުރަކަ ފާމް އިނިޝިއޭޓިވް" ހިމެނެއެވެ.
ބީއެމްއެލްއިން ފާހަގަކުރި ގޮތުގައި މި ހަރަކާތުގައި ބައިވެރިވުމަކީ ތިމާވެށީގެ ދެމެހެއްޓެނިވިކަމަށާއި، ކަނޑުގެ މާހައުލު ރައްކާތެރިކޮށް އަންނަން އޮތް ޖީލުތަކަށްޓަކައި ރާއްޖޭގެ ފަރުތައް ހިމާޔަތްކުރުމަށް ބޭންކުން ދޭ އިސްކަން ރަމްޒުކޮށްދޭ ކަމެކެވެ.
