މި އަހަރުގެ އޯގަސްޓް މަހުގެ 20 ވަނަ ދުވަހުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 27.61 ބިލިއަން ރުފިޔާ ލިބިފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ އެންމެ ފަހުގެ "ވީކްލީ ފިސްކަލް ޑިވަލޮޕްމަންޓްސް" ރިޕޯޓުން ދައްކައިފިއެވެ. މިއީ 2025 ވަނަ އަހަރުގެ މި މުއްދަތުގައި ލިބުނު 25.00 ބިލިއަން ރުފިޔާއާ އަޅާބަލާއިރު 10.4 އިންސައްތައިގެ ކުރިއެރުމެކެވެ.
ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން، އާމްދަނީ އިތުރުވުމަށް އެންމެ ބޮޑު ބާރަކަށްވީ ފަތުރުވެރިކަމުގެ ދާއިރާގެ މުދަލާއި ހިދުމަތުގެ ޓެކްސް (ޓީ.ޖީ.އެސް.ޓީ) އިން ލިބުނު އާމްދަނީއެވެ. ދައުލަތުގެ އާމްދަނީގެ މައިގަނޑު އެއް އަސާސް ކަމަށްވާ ޓީ.ޖީ.އެސް.ޓީގެ ގޮތުގައި 7.39 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ އެ މުއްދަތުގައި ލިބުނު 6.88 ބިލިއަން ރުފިޔާއަށްވުރެ 512.1 މިލިއަން ރުފިޔާ (7.4 އިންސައްތަ) އިތުރު އަދަދެކެވެ.
މީގެ އިތުރުން، ވިޔަފާރިއާއި މުދަލުން ނަގާ ޓެކުހުގެ އާމްދަނީ ވަނީ 20.5 އިންސައްތަ ކުރިއަރައި 5.55 ބިލިއަން ރުފިޔާއަށް އަރާފައެވެ. މީގެ ތެރޭގައި ހިމެނޭ ކޯޕަރޭޓް އިންކަމް ޓެކްސް 7.1 އިންސައްތަ އިތުރުވެ 2.86 ބިލިއަން ރުފިޔާ، ނޮން-ރެޒިޑެންޓް ވިތުހޯލްޑިންގް ޓެކްސް 10.2 އިންސައްތަ އިތުރުވެ 924.5 މިލިއަން ރުފިޔާ އަދި އެހެނިހެން ޓެކުހުން ލިބުނު އާމްދަނީ 87.9 އިންސައްތަ އިތުރުވެ 1.39 ބިލިއަން ރުފިޔާ ވަނީ ލިބިފައެވެ.
ރިޕޯޓުގައި ފާހަގަކޮށްފައިވާ ގޮތުގައި، ޖުމްލަ ޓެކްސް އާމްދަނީ 12.1 އިންސައްތަ އިތުރުވެ 21.48 ބިލިއަން ރުފިޔާއަށް ވަނީ އަރާފައެވެ. އޭގެ ތެރޭގައި:
- އިމްޕޯޓް ޑިއުޓީ: 16.6 އިންސައްތައިގެ ކުރިއެރުމަކާއެކު 2.19 ބިލިއަން ރުފިޔާ
- އާންމު ޖީ.އެސް.ޓީ: 10.8 އިންސައްތައިގެ ކުރިއެރުމަކާއެކު 3.53 ބިލިއަން ރުފިޔާ
- ގްރީން ޓެކްސް: 6.2 އިންސައްތައިގެ ކުރިއެރުމަކާއެކު 1.40 ބިލިއަން ރުފިޔާ
- އެއާޕޯޓް ސާވިސް ޗާޖާއި ޑިޕާޗަރ ޓެކްސް: 13.4 އިންސައްތައިގެ ކުރިއެރުމަކާއެކު 1.24 ބިލިއަން ރުފިޔާ
- އެއާޕޯޓް ޑިވެލޮޕްމަންޓް ފީ: 15.2 އިންސައްތައިގެ ކުރިއެރުމަކާއެކު 1.27 ބިލިއަން ރުފިޔާ
- މުދަލުން ލިބުނު އާމްދަނީ: 31.9 އިންސައްތައިގެ ކުރިއެރުމަކާއެކު 1.68 ބިލިއަން ރުފިޔާ
- ހިލޭ އެހީ: 105.7 އިންސައްތައިގެ ބޮޑު ކުރިއެރުމަކާއެކު 455.7 މިލިއަން ރުފިޔާ
ދައުލަތުގެ ޖުމްލަ ޚަރަދުތަކަށް ބަލާއިރު، ރިކަރަންޓް އަދި ކެޕިޓަލް ޚަރަދުގެ ޖުމްލަ ހުރީ 28.74 ބިލިއަން ރުފިޔާގައެވެ. މިއީ މިދިޔަ އަހަރުގެ އެ މުއްދަތުގައި ހުރި 24.09 ބިލިއަން ރުފިޔާއާ އަޅާބަލާއިރު 19.3 އިންސައްތައިގެ އިތުރުވުމެކެވެ. މީގެ ތެރެއިން ރިކަރަންޓް ޚަރަދަށް 25.00 ބިލިއަން ރުފިޔާ (20.8 އިންސައްތަ އިތުރު) އަދި ކެޕިޓަލް ޚަރަދަށް 3.75 ބިލިއަން ރުފިޔާ (10.2 އިންސައްތަ އިތުރު) ވަނީ ހޭދަކޮށްފައެވެ.
ރިކަރަންޓް ޚަރަދުތަކުގެ ތެރެއިން އެންމެ ބޮޑު އިތުރުވުމެއް ފެނިގެންދިޔައީ ކައުންސިލްތަކަށް ދޭ ގްރާންޓުންނެވެ. އެގޮތުން ކައުންސިލް ގްރާންޓަށް 1.66 ބިލިއަން ރުފިޔާ ހޭދަކޮށްފައިވާއިރު، މިއީ މިދިޔަ އަހަރަށްވުރެ 15.8 އިންސައްތަ އިތުރު އަދަދެކެވެ. މީގެ އިތުރުން މުސާރައާއި އިނާޔަތްތަކަށް 9.39 ބިލިއަން ރުފިޔާ (11.1 އިންސައްތަ އިތުރު)، އިދާރީ އަދި ހިންގުމުގެ ޚަރަދުތަކަށް 15.54 ބިލިއަން ރުފިޔާ (27.0 އިންސައްތަ އިތުރު) ހޭދަވެފައިވެއެވެ. އަދި އެހީއާއި ސަބްސިޑީގެ ގޮތުގައި 8.47 ބިލިއަން ރުފިޔާ ހޭދަވެފައިވާއިރު، އޭގެ ތެރޭގައި ސަބްސިޑީއަށް ކުރި ޚަރަދު 76.3 އިންސައްތަ އިތުރުވެ 3.54 ބިލިއަން ރުފިޔާއަށް އަދި އާސަންދައަށް ކުރި ޚަރަދު 13.5 އިންސައްތަ އިތުރުވެ 1.43 ބިލިއަން ރުފިޔާއަށް އަރާފައިވެއެވެ.
ކެޕިޓަލް ޚަރަދުގެ ދަށުން އިންފްރާސްޓްރަކްޗަރ މަޝްރޫއުތަކަށް 3.26 ބިލިއަން ރުފިޔާ ވަނީ ހޭދަކޮށްފައެވެ. މިއީ 9.1 އިންސައްތައިގެ އިތުރުވުމެކެވެ. މީގެ ތެރޭގައި ބިމާއި އިމާރާތްތަކަށް ކުރި ޚަރަދު 47.1 އިންސައްތަ އިތުރުވެ 1.20 ބިލިއަން ރުފިޔާއަށް، އަދި ފާލަންތަކާއި ބަނދަރު ހެދުމަށް ކުރި ޚަރަދު 63.9 އިންސައްތަ އިތުރުވެ 284.5 މިލިއަން ރުފިޔާއަށް އަރާފައިވެއެވެ. އެހެންނަމަވެސް، މަގުތަކާއި ބްރިޖް އަދި އެއާޕޯޓްތަކަށް ކުރި ހޭދަ ވަނީ މިދިޔަ އަހަރާ އަޅާބަލާއިރު 32.1 އިންސައްތަ ދަށްވެ، 961.3 މިލިއަން ރުފިޔާއަށް މަދުވެފައެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި ރާއްޖޭގެ މައިގަނޑު އިގްތިސާދީ ދާއިރާތަކުން ލިބޭ ޓެކްސް އާމްދަނީ އިތުރުވަމުން އަންނައިރު، ކައުންސިލްތަކާއި އާންމު ހިދުމަތްތަކުގެ އިތުރުން އުމްރާނީ ތަރައްގީގެ މަޝްރޫއުތަކަށް ކުރާ ދައުލަތުގެ ހޭދަވެސް ދަނީ އަހަރުން އަހަރަށް ބޮޑުވަމުންނެވެ.
