ސިނަމާލެ ބުރިޖަށް 8 އަހަރު: ރާއްޖެ-ޗައިނާގެ ވަރުގަދަ ގުޅުން އިތުރަށް ބަދަހިކުރައްވާނެކަމުގެ ޔަޤީންކަން ރައީސް ދެއްވައިފި

މާލެއާއި ވެލާނާ އިންޓަނޭޝަނަލް އެއާޕޯޓް އަދި ހުޅުމާލެ ގުޅުވައިދިން "ސިނަމާލެ ބުރިޖު" ރަސްމީކޮށް ހުޅުވިތާ 8 އަހަރު ފުރުމުގެ މުނާސަބަތުގައި، ދިވެހިރާއްޖެއާއި ޗައިނާއާ ދެމެދު އޮތް ބަދަހި ގުޅުން އިތުރަށް ހަރުދަނާކުރުމަށް ރާއްޖެއިން އަބަދުވެސް އިސްކަންދޭނެ ކަމުގެ ޔަޤީންކަން ރައީސް ޑރ. މުޙައްމަދު މުޢިއްޒު ދެއްވައިފިއެވެ. މި މުނާސަބަތާ ގުޅިގެން "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ، މީގެ އަށް އަހަރު ކުރިން ހުޅުވުނު ޗައިނާ–މޯލްޑިވްސް ފްރެންޑްޝިޕް ބުރިޖަކީ ދެ ޤައުމުގެ ދެމެދުގައި އޮތް ބަދަހި ރަޙްމަތްތެރިކަމުގެ ވަރުގަދަ ރަމްޒެއް ކަމަށެވެ. އަދި މި ބުރިޖަކީ ހަމައެކަނި ޢުމްރާނީ ބޮޑު ބިނާއެއް ނޫންކަމަށާއި، މިއީ ދެ ޤައުމުގެ ދެމެދުގައިވާ އިތުބާރާއި، އެއްބައިވަންތަކަމާއި، ދެ ޤައުމުގެ އެއްގޮތް އުންމީދުތައް ރަމްޒުކޮށްދޭ ދިރިހުރި ހެއްކެއްކަން އެމަނިކުފާނު ފާހަގަކުރެއްވިއެވެ.

Eight years ago today, the China–Maldives Friendship Bridge was opened as a powerful symbol of the enduring friendship between our two nations, connecting our Capital, Malè to the Airport and Hulhumalé. More than infrastructure, it represents the trust, solidarity and shared… pic.twitter.com/8mxqD6POyL

— Dr Mohamed Muizzu (@MMuizzu) August 30, 2026

ރައީސްގެ މެސެޖުގައި ޗައިނާގެ ރައީސް ޝީ ޖިންޕިންގގެ ޙިކުމަތްތެރި ލީޑަރޝިޕަށް ތަޢުރީފު ކުރައްވަމުން ވިދާޅުވީ، އެމަނިކުފާނުގެ އިސްނެންގެވުމުގެ ދަށުން ދެ ޤައުމުގެ ގުޅުން ދުވަހުން ދުވަހަށް ބަދަހިވެ، ފުޅާވަމުންދާ ކަމަށެވެ. އަދި މި ގުޅުމުގެ ސަބަބުން ދެ ޤައުމުގެ ރައްޔިތުންނަށް އިޤްތިޞާދީ އަދި އިޖުތިމާޢީ ގޮތުން އައު ފުރުޞަތުތަކެއް ފަހިވެ، ގުޅިފައިވާ އުޖާލާ މުސްތަޤުބަލަކަށް މަގުފަހިވަމުން އަންނަކަމުގައިވެސް ވިދާޅުވިއެވެ. މީގެއިތުރުން، ސިނަމާލެ ބުރިޖަށް 8 އަހަރު ފުރޭ މި އުފާވެރި މުނާސަބަތުގައި، ދެ ޤައުމުގެ ދެމެދުގައި ޒަމާނުއްސުރެ އޮތް އެކުވެރިކަމުގެ ގުޅުން ދަމަހައްޓައި، ކުރިމަގުގައިވެސް ޗައިނާއާއެކު އޮންނަ ގުޅުން އިތުރު ހަރުފަތްތަކަކަށް ގެންދިއުމަށް ދިވެހި ސަރުކާރުން އަބަދުވެސް ޚާއްޞަ އަހައްމިއްޔަތުކަމެއް ދެއްވާނެކަމުގެ ޔަޤީންކަން ރައީސް ވަނީ ދެއްވާފައެވެ.