އައްޑޫ ސިޓީގައި ކުރިއަށްދިޔަ ބޭސިކް ކެޑޭޓް ކޭމްޕުގައި ބައިވެރިވި ދަރިވަރުންތަކެއް ކާނާ ވިހަވި މައްސަލައެއް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ބަލަން ފަށައިފިއެވެ.
އެޗްއާރުސީއެމުން "އެކްސް" ގައި ކުރި ޕޯސްޓެއްގައި ބުނެފައިވަނީ މި ކޭމްޕުގައި ބައިވެރިވި ކުދިންތަކެއްގެ ހާލު ދެރަވެ ހޮސްޕިޓަލުގައި އެނދުމަތިކުރަން ޖެހުމަކީ އެ ކޮމިޝަނުން ނުހަނު ކަންބޮޑުވާ ކަމެއް ކަމަށެވެ. އަދި މި މައްސަލައާ ގުޅިގެން ކަންހިނގަމުންދާ ގޮތް ކޮމިޝަނުން ވަރަށް ގާތުން މޮނިޓަރކުރަމުން އަންނަ ކަމަށްވެސް ހާމަކޮށްފައިވެއެވެ.
އައްޑޫ ސިޓީ ބޭސިކް ކެޑޭޓް ކޭމްޕުގައި ބައިވެރިވި ދަރިވަރުން ކާނާ ވިހަވެ ބައެއް ކުދިން ހާލުދެރަވެ ހޮސްޕިޓަލުގައި އެނދުމަތިކުރަންޖެހުމަކީ މިކޮމިޝަނުން ނުހަނު ކަންބޮޑުވާ ކަމެކެވެ. ކޮމިޝަނުން މިގެންދަނީ މި މައްސަލަ މޮނިޓަރކުރަމުންނެވެ.
މިކަން ހިގާދިޔަ ގޮތް ޙައްސާސް މައްސަލައެއްގެ…
— HRC of the Maldives (@hrcmv) August 24, 2026
މީގެއިތުރުން، މި ހާދިސާ ހިނގައިދިޔަ ގޮތް ހައްސާސް މައްސަލައެއްގެ ގޮތުގައި ބަލައި ތަހުގީގުކުރުމަށް ކަމާބެހޭ އިދާރާތަކަށް އެޗްއާރުސީއެމުން ވަނީ ގޮވާލާފައެވެ. އަދި މިފަދަ ނުރައްކާތެރި ކަންކަން ކުރިއަށް އޮތް ތަނުގައި ތަކުރާރު ނުވާނޭ ފަދަ ގޮތަކަށް އިންތިޒާމުތައް ބައްޓަންކޮށް، ފުރިހަމައަށް ބަލަހައްޓަމުން ގެންދިއުމަށްވެސް ކޮމިޝަނުން ވަނީ އިލްތިމާސްކޮށްފައެވެ.
އެޗްއާރުސީއެމުން ވަނީ މި ހާދިސާގައި ކާނާ ވިހަވެގެން ފަރުވާ ހޯދަމުންދާ އެންމެހައި ދަރިވަރުންނަށާއި ފަރާތްތަކަށް އަވަސް ޝިފާއަކަށް އެދިފައެވެ.
