ދިވެހި މެޑިކަލް ގްރެޖުއޭޓުން ތަމްރީނުކުރުމާ ގުޅޭ ގޮތުން ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާ އާއި ސްރީލަންކާގެ ސުވަސެވަނާ ހޮސްޕިޓަލާ ދެމެދު މިއަދު ފަހުމުނާމާ (އެމް.އޯ.ޔޫ) އެއްގައި ސޮއިކޮށްފިއެވެ.
މިކަމަށްޓަކައި މިއަދު ބޭއްވި ރަސްމިއްޔާތުގައި، ދިވެހިރާއްޖޭގެ ފަރާތުން މި އެމް.އޯ.ޔޫގައި ސޮއިކުރެއްވީ މިނިސްޓަރ އޮފް ސްޓޭޓް ފޯރ ހެލްތު، ފެމިލީ އެންޑް ވެލްފެއަރ، ޚަދީޖާ ޢަބްދުއްޞަމަދު ޢަބްދުﷲ އެވެ. ސުވަސެވަނަ ހޮސްޕިޓަލުގެ ފަރާތުން ސޮއިކުރެއްވީ އެ ހޮސްޕިޓަލުގެ ޑިރެކްޓަރ މިސްޓަރ ބަންޑުލާ އެގޮޑަގޭ އެވެ.
މި ރަސްމިއްޔާތުގައި މިނިސްޓަރ އޮފް ހެލްތު، ފެމިލީ އެންޑް ވެލްފެއަރ، ޤީލާ ޢަލީގެ އިތުރުން ހެލްތު މިނިސްޓްރީގެ އިސް ވެރިންނާއި، ސުވަސެވަނާ ހޮސްޕިޓަލުގެ ބޭފުޅުން އަދި މިނިސްޓްރީ އޮފް ފޮރިން އެފެއާޒުގެ އިސްވެރިން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ހެލްތު، ފެމިލީ އެންޑް ވެލްފެއަރ، ޤީލާ ޢަލީ ވަނީ ޞިއްޙީ ދާއިރާއަށް ބޭނުންވާ ޑޮކްޓަރުން ތަމްރީނު ކުރުމުގައި މިއަދު ސޮއި ކުރެވުނު އެމް.އޯ.ޔޫގެ ސަބަބުން ވަރަށް ބޮޑެތި ފަސޭހަތަކެއް ވާނެ ކަމަށް ވިދާޅުވެފައެވެ. އެކަމަނާ ފާހަގަކުރެއްވި ގޮތުގައި މި ޕާޓްނަރޝިޕްއަކީ މުހިއްމު ޕާޓްނަރޝިޕް އެއްކަމާ، އޭގެ ސަބަބުން ދިވެހި މެޑިކަލް ގްރެޖުއޭޓުންނަށް ޚާއްސަ ކްލިނިކަލް ތަމްރީނާއި ޢަމަލީ ތަޖުރިބާ ހޯދުމުގެ ފުރުޞަތު ފުޅާވެ، އެފަރާތްތަކުގެ ޤާބިލުކަން އިތުރުކުރުމަށް މަގުފަހިވެގެންދާނެއެވެ.
ހެލްތު މިނިސްޓްރީން ބުނީ މި އެމް.އޯ.ޔޫގެ މަޤްޞަދަކީ އިންތިޒާމުވެގެން ހިންގޭ ކްލިނިކަލް އިންޓަރންޝިޕް ޕްރޮގްރާމެއްގެ ޒަރީޢާއިން ޤާބިލު މެޑިކަލް ޕްރޮފެޝަނަލުން ބިނާކުރުމުގައި އެ މިނިސްޓްރީ އާއި ސުވަސެވަނާ ހޮސްޕިޓަލާ ދެމެދު އޮތް ގުޅުން ބަދަހިކުރުން ކަމަށާއި، މި އެއްބަސްވުމުގެ ދަށުން، ސުވަސެވަނަ ހޮސްޕިޓަލުން ދިވެހި އެމް.ބީ.ބީ.އެސް ގްރެޖުއޭޓުންނަށް އެއް އަހަރު ދުވަހުގެ ކްލިނިކަލް އިންޓަރންޝިޕްގެ ފުރުޞަތު ފޯރުކޮށްދޭނެ ކަމަށެވެ. އަދި އަހަރަކު 20 ދަރިވަރުން ތަމްރީނުކުރުމުގެ ޖާގަ ފޯރުކޮށްދިނުމަށް ވަނީ އެއްބަސްވެފައެވެ.
