އުމުރުފުޅުން 74 އަހަރުގައި ގަތަރުގެ ކުރީގެ އަމީރު ޝައިޚް ހަމަދު ބިން ޚަލީފާ އާލް ޘާނީ އަވަހާރަވުމަކީ، މުޅި މެދުއިރުމައްޗަށާއި ބައިނަލްއަގުވާމީ މައިދާނަށް މޮޅިވެރިކަން ގެނުވިކަމެކެވެ. ގަތަރުގެ ރައްޔިތުންގެ މެދުގައި އަދި ރަސްމީ ދައުލަތުގެ ލިޔެކިޔުންތަކުގައި އެމަނިކުފާނަށް ކިޔައިއުޅެނީ "ބާބާ އަމީރު" އެވެ. ޝައިޚް ހަމަދަކީ އެ ގައުމަކީ ދުނިޔޭގެ އެންމެ މުއްސަނދި، އަދި ސިޔާސީ ގޮތުންނާއި އިގްތިސާދީ ގޮތުން އެންމެ ނުފޫޒުގަދަ އެއް ގައުމަށް ހެއްދެވި ހަގީގީ ބާނީއެވެ.
1952 ވަނަ އަހަރު ދޯހާއަށް އުފަންވެވަޑައިގެންނެވި ޝައިޚް ހަމަދު، ސާނަވީ ތައުލީމު ހާސިލްކުރެއްވީ ގަތަރުންނެވެ. އެއަށްފަހު، އެމަނިކުފާނު ވަޑައިގެންނެވީ އިނގިރޭސިވިލާތުގެ ބައިނަލްއަގުވާމީ ގޮތުން އެންމެ ޝަރަފުވެރި އަސްކަރީ އެކަޑެމީ ކަމަށްވާ ރޯޔަލް މިލިޓަރީ އެކަޑެމީ ސޭންޑްހަރސްޓް އަށެވެ.
1971 ވަނަ އަހަރު ސޭންޑްހަރސްޓުން ދަސްވެނިވެވަޑައިގެން ގައުމަށް އެނބުރި ވަޑައިގަތުމަށްފަހު، ގަތަރުގެ އަސްކަރިއްޔާ ޒަމާނީ ފެންވަރަކަށް ތަރައްގީކުރެއްވުމުގައި މުހިންމު ދައުރެއް އަދާކުރެއްވިއެވެ. އެމަނިކުފާނު ވަނީ ގައުމުގެ ޑިފެންސް މިނިސްޓަރުކަމާއި، ސިފައިންގެ ކޮމާންޑަރއިންޗީފް ކަމާއި، އަދި ގައުމުގެ ވަލީއަހުދު ކަމުގެ މަގާމު ފުރުއްވާފައެވެ.
1995 ވަނަ އަހަރު ޝައިޚް ހަމަދު ގައުމުގެ ވެރިކަމާ ހަވާލުވެވަޑައިގަތް އިރު، ގަތަރަކީ ގަލްފް ސަރަހައްދުގެ އެހެން ބޮޑެތި ބާރުތަކުގެ ފަހަތުގައި އޮތް، އަދި ތެލުގެ އަގަށް އަންނަ ބަދަލުތަކަށް މުޅިން ބިނާވެފައި އޮތް ކުޑަ ޖަޒީރާއެކެވެ. ނަމަވެސް އެމަނިކުފާނުގެ ވިސްނުންފުޅަކަށްވީ ގަތަރަކީ އެހެން ގައުމުތަކަށް ބަރޯސާނުވާ، އަމިއްލަ ފައިމައްޗަށް ތެދުވެފައިވާ މިނިވަން ބާރަކަށް ހެއްދެވުމެވެ.
ޝައިޚް ހަމަދުގެ 18 އަހަރުވީ ކާމިޔާބު ވެރިކަމުގައި އެމަނިކުފާނު ވަނީ ގަތަރުގެ ތާރީޚު ދުވަހަކުވެސް ނުދެކޭ ފަދަ ބޮޑެތި ބަދަލުތަކެއް ގެންނަވާފައި
- ނޯތްފީލްޑުން ގޭސް ބޭރުކުރަން ފެށުން
ގަތަރުގެ އައްސޭރިން ބޭރުގައި އޮތް "ނޯތު ފީލްޑް" އަކީ ދުނިޔޭގައި އޮތް އެންމެ ބޮޑު ގޭސް ފީލްޑެވެ. ޝައިޚް ހަމަދު ވެރިކަމަށް ވަޑައިގެން، ބޮޑެތި ލޯނުތައް ނަންގަވައިގެން، މި ގޭސްފީލްޑުން ގޭސް ބޭރުކުރާނެ ވަރުގަދަ ނިޒާމެއް ގާއިމުކުރެއްވިއެވެ. މިއީ އެ ދުވަސްވަރު ވަރަށް އިގްތިސާދީގޮތުން ނުރައްކާތެރި ކަމެއްގެ ގޮތުގައި ބެލެވުނު ނަމަވެސް، މި ނިންމެވުމުގެ ސަބަބުން ގަތަރު ވެގެންދިޔައީ ދުނިޔޭގައި އެންމެ ގިނައިން ގޭސް ބޭރުކުރާ، އަދި ޖީޑީޕީގެ ނިސްބަތުން ދުނިޔޭގެ އެންމެ މުއްސަނދި ގައުމަށެވެ.
- އަލް ޖަޒީރާ މީޑިއާ ނެޓްވޯކް
1996 ވަނަ އަހަރު ޝައިޚް ހަމަދުގެ ސީދާ ބެއްލެވުމުގެ ދަށުން އަލް ޖަޒީރާ ޗެނަލް އުފެއްދެވިއެވެ. އެއާ އެކު، އަރަބި ދުނިޔޭގައި ސަރުކާރުތަކުގެ ކޮންޓްރޯލް ނެތް، މިނިވަންކަމާއެކު ޚަބަރު ފަތުރާ ފުރަތަމަ މީޑިއާ އުފެދިގެންދިޔައެވެ. އަލް ޖަޒީރާ ވެގެންދިޔައީ ބައިނަލްއަގުވާމީ ސިޔާސީ މައިދާނުގައި ގަތަރުގެ ނުފޫޒު މުޅި ދުނިޔެއަށް ފަތުރާލި އެންމެ ވަރުގަދަ ހަތިޔާރަށެވެ.
- ދުނިޔޭގެ އެކި ކޮޅުތަކުގައި ގަތަރުގެ ނަން ވިދާލުން
ގަތަރުގެ މުއްސަނދިކަން ދެމެހެއްޓުމަށްޓަކައި އެމަނިކުފާނު ގަތަރު އިންވެސްޓްމަންޓް އޮތޯރިޓީ އުފެއްދެވިއެވެ. މި ފަންޑު މެދުވެރިކޮށް އިނގިރޭސިވިލާތުގެ މަޝްހޫރު ހެރޮޑްސް ޑިޕާޓްމަންޓް ސްޓޯރާއި، ލަންޑަންގެ އެންމެ އުސް އިމާރާތް ކަމަށްވާ ދަ ޝާޑް ގެ ބޮޑު ބައެއްގެ އިތުރުން، ފްރާންސްގެ މަޝްހޫރު ޕީ.އެސް.ޖީ ފުޓްބޯޅަ ކްލަބް ފަދަ ބޮޑެތި ކަންކަން ގަތަރުގެ މިލްކިއްޔާތުގެ ދަށަށް ގެންނެވިއެވެ.
ވެރިކަން ދޫކޮށްލެއްވުން ؛އަރަބި ދުނިޔެއަށް ދެއްވި ނަމޫނާ:
އަރަބި ދުނިޔޭގެ ވެރިން އާންމުކޮށް އަވަހާރަވަންދެން ވެރިކަމުގައި ތިއްބަވާ އުސޫލު މުގުރާލައްވަމުން، 2013 ޖޫން މަހު ޝައިޚް ހަމަދު ވަނީ އަމިއްލަފުޅަށް ވެރިކަމުން އެކަހެރިވެވަޑައިގެންފައެވެ. އަދި ގައުމުގެ ވެރިކަން އެމަނިކުފާނުގެ ޒުވާން ދަރިކަލުން، އަދި މިހާރުގެ އަމީރު ޝައިޚް ތަމީމް ބިން ހަމަދު އާލް ޘާނީއާ ސުލްހަވެރިކަމާއެކު ހަވާލުކުރެއްވިއެވެ. މިއީ މުޅި މެދުއިރުމަތިންވެސް ނުފެންނަ ފަދަ ޑިމޮކްރެޓިކް އަދި ހަރުދަނާ ނަމޫނާއެކެވެ.
ޒަމާނީ ގަތަރުގެ ސްކައިލައިން ފެންނަ ކޮންމެ ދިމާލަކުންނާއި، ދުނިޔޭގެ އެންމެ ފެންވަރު ރަނގަޅު އެއާލައިން ކަމަށްވާ ގަތަރު އެއާވޭސްގެ ކާމިޔާބީންވެސް ފެންނަން އޮތީ ޝައިޚް ހަމަދުގެ ދުރުވިސްނުންފުޅެވެ. އެމަނިކުފާނު އަވަހާރަވީ ނަމަވެސް، ކުޑަ ގައުމަކަށް ބޮޑުކޮށް ވިސްނައި، ދުނިޔޭގެ ކުރިބޯށީގައި ފައިތިލަ ހާސިލްކުރާނެ ގޮތުގެ ބްލޫޕްރިންޓް އެމަނިކުފާނު ވަނީ ގަތަރަށާއި މުޅި އިސްލާމީ އުންމަތަށް ދޫކުރައްވާފައެވެ.