ހުޅުމާލޭ ދެވަނަ ފިޔަވަހީގައި ހައުސިން ޑިވެލޮޕްމެންޓް ކޯޕަރޭޝަން ގެ ބިންތައް މަދުވުމުގެ ސަބަބުން، ރައްޔިތުންނަށް ބޭނުންވާ ހިދުމަތްތައް ފުޅާކުރުމަށްޓަކައި އާންމުންނަށް ދޫކޮށްފައިވާ ބިންތައް ވިޔަފާރި އުސޫލުން ބޭނުންކުރެވޭނެ މަގު ފަހިކުރަންޖެހޭ ކަމަށް ގެދޮރުވެރިކަމާއި ބިނާރާއި އުމްރާނީ ތަރައްގީއާ ބެހޭ ވަޒީރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ހިޔާ ފްލެޓްތަކުގައި އަލަށް ހަރުކުރި 32 ލިފްޓުގެ މަސައްކަތް ނިންމައި، އެކަން ރަސްމީކޮށް އިފްތިތާހުކުރުމަށް ބޭއްވި "މަގޭ ހިޔާ" ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، ދެވަނަ ފިޔަވަހީގައި މީހުން ދިރިއުޅެން ފެށިއިރު އަސާސީ ހިދުމަތްތައް ގާއިމުވެފައި ނެތުމުގެ ސަބަބުން ރައްޔިތުންނަށް ގިނަ ދަތިތަކަކާއި ކުރިމަތިލާންޖެހުނު ކަމަށެވެ. އަދި ބިން ނެތުމުގެ ދަތިކަން އެޗްޑީސީއަށް ކުރިމަތިވެފައިވީ ނަމަވެސް، ވޭތުވެދިޔަ ދެ އަހަރު ދުވަހުގެ ތެރޭގައި ރައްޔިތުންނަށް ހިދުމަތްތައް ފޯރުކޮށްދިނުމަށް ގިނަ މަސައްކަތްތަކެއް ކުރެވިފައިވާކަން އޭނާ ފާހަގަކުރެއްވިއެވެ.
ވަޒީރު ވިދާޅުވި ގޮތުގައި، ހުޅުމާލޭގެ ފޭސް 2 އަދި 3 އިން ދިވެހިންނަށް 2،000 އަށްވުރެ ގިނަ ގޯތި ދޫކޮށްފައިވާއިރު، މިހާރު އެޗްޑީސީގެ ބެލުމުގެ ދަށުގައި ހުރި މަދު ބިމުން އެކަނި ރައްޔިތުން ބޭނުންވާ ހުރިހާ ވިޔަފާރިތަކާއި ހިދުމަތްތަކެއް ފޯރުކޮށެއް ނުދެވޭނެއެވެ. އެހެންކަމުން، ހަމައެކަނި ދިރިއުޅުމަށް ބޭނުންކުރާ ގޮތަށް މިހާރު ތަޅުއެޅިފައި ހުރި އަމިއްލަ ފަރާތްތަކުގެ ބިންތަކުގައި ޕްރީސްކޫލް، ކްލިނިކް ނުވަތަ ޝޮޕިން ކޮމްޕްލެކްސް ފަދަ ތަންތަން ހަދައިގެން އިންވެސްޓްކުރުމުގެ ފުރުސަތު އާންމުންނަށް ލިބެންޖެހެއެވެ.
މި ބަދަލުގެ ސަބަބުން ހަމައެކަނި ބިންވެރިންނަށް ފައިދާވުމުގެ އިތުރުން، ދެވަނަ ފިޔަވަހީގެ އިޤްތިސޯދު ފުޅާވެ، އައު ވިޔަފާރިތަކާއި ގިނަ ވަޒީފާގެ ފުރުސަތުތައް އުފެދިގެންދާނެ ކަމަށް ވަޒީރު ފާހަގަކުރެއްވިއެވެ.
ސަރުކާރުގެ އަމާޒަކީ ހުޅުމާލޭގެ ތޮއްޖެހުމާއި ބިންމަދުކަމުގެ މައްސަލައަށް ހައްލެއް ހޯދައި، ރައްޔިތުންނަށް ލުއިފަސޭހަވާނެހެން ބިންތައް އެންމެ އެކަށީގެންވާ ގޮތެއްގައި ބޭނުންކުރުމުގެ ފުރުސަތު ދިނުން ކަމަށާއި، އެކަމަށްޓަކައި ބޭނުންވާ ޕްލޭންތަކަށް ބަދަލުތައް ގެނައުމުގެ މަސައްކަތް ކުރަމުންދާނެ ކަމަށްވެސް ވަޒީރު މުއްތަލިބް ވިދާޅުވިއެވެ.