ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ، ޤައުމީ ދާރުލްއާސާރުގައި މިވަގުތުވެސް 1,500 އަހަރަށްވުރެ ގިނަ ދުވަސްވީ ތަކެތި ހިމެނޭހެން 700 އެއްހާ ތާރީޚީ އާސާރު ދައްކާލަން ބަހައްޓާފައިވާ ކަމަށެވެ. ނަމަވެސް އެތަކެތީގެ ދަރަޖަކުރުމާއި، މިންކޮށް ރައްކާތެރިކަމާއެކު ބެލެހެއްޓުމުގައި މިހާރު ގޮންޖެހުންތަކެއް ހުރިކަން ހީނާ ފާހަގަކުރެއްވިއެވެ. އޭނާ ވިދާޅުވީ ދާރުލްއާސާރު ހުޅުވި ފަހުން މިހާތަނަށް އެދެވޭ ބޮޑު މަރާމާތެއް ކުރެވިފައި ނުވާތީ، އެތަން ވަރަށް ބޮޑަށް ތަރައްގީކުރަން ޖެހިފައިވާ ކަމަށެވެ. އެހެންކަމުން ޗައިނާގެ އެހީތެރިކަމާއެކު ވަރަށް އަވަހަށް މި މަޝްރޫއުގެ އަމަލީ މަސައްކަތް ފެށިގެންދާނެއެވެ.
މިހާރު ޤައުމީ ދާރުލްއާސާރު ހިންގަމުން އަންނަ އިމާރާތަކީވެސް 2010 ވަނަ އަހަރުގެ ޖުލައި މަހު ޗައިނާ ސަރުކާރުގެ 5 މިލިއަން ޑޮލަރުގެ އެހީގައި ބިނާކޮށް، ދިވެހި ސަރުކާރާ ހަވާލުކުރި އިމާރާތެކެވެ. ރާއްޖޭގައި އެންމެ ފުރަތަމަ ދާރުލްއާސާރެއް ހުޅުވީ 19 ނޮވެންބަރު 1952 ގައި އޭރުގެ ވަޒީރުލްއައުޒަމް މުހައްމަދު އަމީނުގެ ބެއްލެވުމުގެ ދަށުންނެވެ. މިހާރުގެ އިމާރާތުގެ ބިންގާ ރައީސް މައުމޫން އަބްދުލްޤައްޔޫމް އަޅުއްވައިދެއްވިއިރު، އެތަން ރަސްމީކޮށް ހުޅުވައި ބޭނުންކުރަން ފެށީ ރައީސް މުހައްމަދު ނަޝީދުގެ ވެރިކަމުގައެވެ.
ޤައުމީ ދާރުލްއާސާރަކީ ރާއްޖޭގެ އެވޭލާ ޒަމާނުގެ ތާރީޚާއި، ސަގާފަތާއި، ތަރިކައިގެ އިތުރުން ރަސްކަމުގެ ޖީލުތަކާއި ރާއްޖެއަށް އައިސްފައިވާ ބޮޑެތި ބަދަލުތަކުގެ މައުލޫމާތު އެއް ފުރާޅެއްގެ ދަށުން ފެންނަން ހުރި އެންމެ މުހިންމު މަރުކަޒެވެ.
