އަލުން ފެށި ހިދުމަތުގެ ދަށުން ކޮންމެ ދުވަހަކު ދުބާއީއާއި މާލެއާ ދޭތެރޭ ދަތުރުކުރާނީ "އީކޭ 652" ފްލައިޓެވެ. ބޮއިންގް 777 މަތިންދާބޯޓު ބޭނުންކުރާ މި ރޫޓަކީ ދުބާއީން ފުރައިގެން ކޮލަމްބޯ މަގުން މާލެއަށް އައުމަށްފަހު، އެނބުރި ދުބާއީއަށްދާ ދަތުރެކެވެ. މެދުއިރުމަތީގެ ވައިގެ ސަރަހައްދުތައް ބަންދުކުރުމުގެ ސަބަބުން ސަރަހައްދީ ވައިގެ ދަތުރުފަތުރަށް ބޮޑެތި ބުރޫތަކެއް އަރައި، އެތައް ހާސް ފްލައިޓެއް ކެންސަލްކުރަން ޖެހުނު ނަމަވެސް، ހާލަތު ބަދަލުވެ މިހާރު މިވަނީ ހިދުމަތްތައް އިއާދަވާން ފަށާފައެވެ.
ރާއްޖެއަށް އެންމެ ފުޅާދާއިރާއެއްގައި ހިދުމަތްދޭ ބައިނަލްއަގްވާމީ އެއް އެއާލައިން ކަމަށްވާ އެމިރޭޓްސްގެ އުދުހުންތައް އަލުން ފެށުމާއެކު، މެދުއިރުމައްޗާއި ޔޫރަޕްގެ އިތުރުން އުތުރު އެމެރިކާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެއެވެ. މީގެ އިތުރުން، މި ހިދުމަތް އަނބުރާ އައުމަކީ ރާއްޖެއާއި ޔުނައިޓެޑް އަރަބް އެމިރޭޓްސް އާ ދެމެދު އޮންނަ ފަތުރުވެރިކަމާއި ވިޔަފާރީގެ ބަދަހި ގުޅުން އިތުރަށް ވަރުގަދަވެގެންދާނެ ކަމެކެވެ.
