ދިވެހިރާއްޖެއާއި ސައުދީ އަރަބިއްޔާއާ ދެމެދު ދިފާއީ ދާއިރާއިން އޮންނަ ގުޅުން އިތުރަށް ބަދަހިކުރުމާ ގުޅޭގޮތުން ދެ ގައުމުގެ މެދުގައި ރަސްމީ މަޝްވަރާތައް ބާއްވައިފިއެވެ.
މި މަޝްވަރާތައް ކުރިއަށް ގޮސްފައިވަނީ ދިވެހިރާއްޖޭގެ ޑިފެންސް މިނިސްޓަރު ހަސަން ރަޝީދު، ސައުދީ އަރަބިއްޔާގެ ދިފާއީ މިނިސްޓަރު ޕްރިންސް ހާލިދު ބިން ސަލްމާން ބިން އަބްދުލްއަޒީޒް އަލް ސައުދުގެ ރަސްމީ ދައުވަތަކަށް އެ ގައުމަށް ކުރައްވަމުންދާ ދަތުރުފުޅުގެ ތެރެއިން ބޭއްވުނު ބައްދަލުވުމެއްގައެވެ.
Met with the Minister of Defense and National Service of the Maldives, Hassan Rasheed. We reviewed our bilateral relations and prospects for defense cooperation. We also discussed regional and international developments and efforts to promote security and stability in the region. pic.twitter.com/W7Ux8AaAbP
— Khalid bin Salman خالد بن سلمان (@kbsalsaud) June 30, 2026
މި ބައްދަލުވުމުގައި ދެ ގައުމުގެ ދެމެދުގައި އޮތް ތާރީޚީ ގުޅުމުގެ މައްޗަށް އަލިއަޅުވާލައްވައި، އަސްކަރީ އަދި ދިފާއީ ދާއިރާއިން އެއްބާރުލުން އިތުރުކުރެވިދާނެ ގޮތްތަކާ ބެހޭގޮތުން ފުޅާ ދާއިރާއެއްގައި ވަނީ މަޝްވަރާ ކުރައްވާފައެވެ. އޭގެ އިތުރުން، ސަރަހައްދީ އަދި ބައިނަލްއަގްވާމީ މަޝްރަހުގައި ހިނގަމުންދާ މުހިންމު ކަންތައްތަކަށް ބަލައި، ސަރަހައްދުގެ ސަލާމަތާއި ހަމަޖެހުން ދެމެހެއްޓުމަށް ދެ ގައުމުން ގުޅިގެން ކުރެވިދާނެ މަސައްކަތްތަކާ ބެހޭގޮތުން ވެސް ދެ ބޭފުޅުން ޚިޔާލު ބަދަލުކުރެއްވިއެވެ.
ހަސަން ރަޝީދު ވަނީ ސައުދީގެ އިސްލާމިކް މިލިޓަރީ ކައުންޓާ ޓަރަރިޒަމް ކޯލިޝަނުގެ ޑެޕިއުޓީ މިލިޓަރީ ކޮމާންޑަރު، މޭޖާ ޖެނަރަލް އަބްދުﷲ ބިން ހަމަދު އަލް ގުރޭޝީއާ ވެސް ބައްދަލު ކުރައްވައިފައެވެ. މި ބައްދަލުވުމުގައި ނިރުބަވެރިކަމާ ދެކޮޅަށް ކުރެވޭ މަސައްކަތްތަކުގައި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށާއި، ގުޅިގެން ތަމްރީނުތައް ހިންގައި ދެފަރާތުގެ ފަންނީ ގާބިލުކަން އިތުރުކުރުމަށް ކުރެވޭ މަސައްކަތްތައް ފުޅާކުރުމާ ގުޅޭގޮތުން ވަނީ މަޝްވަރާކުރައްވައިފައެވެ.
