ރާއްޖޭގެ މިވަގުތުގެ އިގްތިސާދީ ހާލަތަށް ބަލާއިރު، އެތެރޭގެ އުދުހުންތަކުގެ އަގު ހެޔޮކުރުމަކީ ބޮޑު ގޮންޖެހުމެއް ކަމަށް ފަތުރުވެރިކަމާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. ރައްޔިތުންގެ މަޖިލީހުގެ ޖަލްސާގައި ކެންދޫ ދާއިރާގެ މެންބަރު މައުރޫފް ޒާކިރު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، ގައުމީ އެއަރލައިންގެ އެތެރޭގެ ދަތުރުތަކުގެ އަގު ކުޑަކުރުމަށް އެޅޭ އެންމެ ބޮޑު ހުރަހަކީ، އެކަށީގެންވާ އޮޕަރޭޝަނެއް ހިންގުމަށް ބޭނުންވާ ވަރަށް ފަސިންޖަރުން ނެތުން ކަމަށެވެ.
މިހާރުވެސް ރާއްޖޭގައި އެތެރޭގެ އުދުހުންތަކުގެ ޓިކެޓު އަގުތައް ހުރީ ހިންގުމުގެ ޚަރަދަށްވުރެ ބޮޑުކޮށް ނޫންކަން ވަޒީރު ފާހަގަކުރެއްވިއެވެ. މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގުބޮޑުވެ، ބައިނަލްއަޤުވާމީ އުދުހުންތަކުގެ އަގުތައް 30 އާއި 40 އިންސައްތައާ ދެމެދުގެ މިންވަރަކަށް މަތިންދާބޯޓުތަކުގެ ޓިކެޓް އަގު ބޮޑުވި ނަމަވެސް، ރާއްޖޭގައި ޓިކެޓް އަގުބޮޑުނުކޮށް ހިފަހައްޓާފައިވަނީ އާއްމުންނަށް ދިމާވާނެ ދަތިތައް ކުޑަކުރުމަށް ސަރުކާރުން ގެންގުޅޭ ޚާއްސަ ސިޔާސަތުގެ ދަށުންނެވެ. ރައީސުލްޖުމްހޫރިއްޔާގެ ނިންމެވުންތަކާ އެއްގޮތަށް، ޚަރަދުތައް އެހެން ގޮތްގޮތަށް މެނޭޖްކޮށްގެން މިހާތަނަށްވެސް އަގުތައް އެއްވަރެއްގައި ހިފަހައްޓާފައިވާ ކަމަށް ވަޒީރު ވިދާޅުވިއެވެ.
ރާއްޖޭގެ އެތެރޭގެ ދަތުރުތަކަށް ބޭނުންކުރާ އޭޓީއާރު މަތިންދާބޯޓުތަކަކީ ބައިނަލްއަޤުވާމީ ގޮތުން ބަލާއިރު ރައްކާތެރިކަން ބޮޑު، ފެންވަރު ރަނގަޅު ބޯޓުތަކަކަށް ވުމާއެކު، އެ ބޯޓުތައް އޮޕަރޭޓްކުރުމަށް ބޮޑު ޚަރަދެއް ހިނގައެވެ. ވަޒީރު ވިދާޅުވި ގޮތުގައި މިފަދަ ބޯޓުތައް ބޭނުންކުރަނީ ކަސްޓަމަރުންނަށް ވީހާވެސް ފުރިހަމަ އަދި ރައްކާތެރި ޚިދުމަތެއް ފޯރުކޮށްދިނުމުގެ މަގްސަދުގައެވެ.