ޢާއިލީ މައްސަލަތައް ކޯޓުން ބޭރުގައި ސުލްހަވެރިކަމާއެކު ޙައްލުކުރުމަށް ބޭނުންވާ މީޑިއޭޓަރުން ތަމްރީނުކުރުމަށް ކުރިއަށްގެންދިޔަ "ނޭޝަނަލް ފެމިލީ މީޑިއޭޝަން ޓްރެއިނިންގ އޮފް ޓްރެއިނާސް" ޕްރޮގްރާމް ކާމިޔާބުކަމާއެކު ނިންމާލައިފިއެވެ.
މިދިޔަ 7 ދުވަހުގެ މުއްދަތަށް ކުރިއަށްދިޔަ މި ތަމްރީނު ޕްރޮގްރާމްގައި 25 ބައިވެރިންނ ބައިވެރިވިއެވެ. މި ޕްރޮގްރާމްގެ ބައިވެރިން ވަނީ ޢާއިލީ މައްސަލަތަކުގައި މީޑިއޭޓްކުރުމަށް ނުވަތަ މައްސަލަ ސުލްހަކުރުމަށް ބޭނުންވާ މުހިންމު ޢިލްމާއި ހުނަރުތައް ދަސްކޮށް، ފުރިހަމަ ގާބިލްކަން ހޯދާފައެވެ. މި ތަމްރީނު ފުރިހަމަކުރި ހުރިހާ ބައިވެރިންނަށް މިއަދު ވަނީ މަރުހަބާ ކިޔާފައެވެ.
މި ޕްރޮގްރާމަކީ ދިވެހިރާއްޖޭގެ ޝަރުޢީ ދާއިރާ (ޖުޑީޝަރީ) އާ ގުޅިގެން، ޢާއިލާތަކުގެ ދެމެދުގައި ޖެހޭ މައްސަލަތައް ހަރުދަނާ ނިޒާމެއްގެ ދަށުން ހައްލުކުރުމަށް އެޅުނު ވަރަށް މުހިންމު އަދި ފާހަގަކޮށްލެވޭ ފިޔަވަޅެކެވެ. މިއީ މުޖުތަމަޢުގައި ދިމާވާ ޢާއިލީ ރޫޅުންތަކާއި މައްސަލަތަކަށް ސުލްހަވެރި ހައްލެއް ހޯދައިދިނުމަށް އެހީތެރިވެދޭނެ ކަމެކެވެ.
މި ނިޒާމު އިތުރަށް ހަރުދަނާކޮށް، ގައުމުގައި ބަދަހި އަދި ދުޅަހެޔޮ ޢާއިލާތަކެއް ބިނާކުރުމަށްޓަކައި ޝަރުޢީ ދާއިރާއާއެކު ފެށިފައިވާ މި ގާތް މަސައްކަތާއި ގުޅުން ކުރިއަށް އޮތް ތަނުގައިވެސް އިތުރަށް ފުޅާކޮށް ދެމެހެއްޓުމަށް އުންމީދުކުރާ ކަމަށް މި ޕްރޮގްރާމްގެ އިންތިޒާމްކުރި ފަރާތްތަކުން ހާމަކުރެއެވެ.
