ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް ވިދާޅުވީ، ރާއްޖެއަށް އަލަށް ތައާރަފުކުރި މި ޚިދުމަތަށް އާންމުންގެ ފަރާތުން ބޮޑު ތަރުހީބެއް ލިބެމުންދާ ކަމަށެވެ. އެގޮތުން، މިހާތަނަށް 3,280 ޔޫޒަރުން އެކައުންޓް ލިންކްކޮށްފައިވާއިރު، އޭގެ ތެރެއިން 2,159 ޔޫޒަރުން މިހާރު ވަނީ ޑިޖިޓަލް ވޮލެޓް އެކްޓިވޭޓްކޮށް، ޚިދުމަތް ބޭނުންކުރަން ފަށާފައެވެ.
ކުރީގެ ސަރުކާރުތަކުން ޕޭޕަލް ރާއްޖެއަށް ގެނައުމަށް ކުރި މަސައްކަތް ކާމިޔާބުވެފައި ނުވި ނަމަވެސް، މި ސަރުކާރުން ވެރިކަމުގެ ފުރަތަމަ ދުވަހުން ފެށިގެން މިކަމަށް ޚާއްސަ އިސްކަމެއް ދީގެން މަސައްކަތް ކުރިކަން ރައީސް ފާހަގަކުރެއްވިއެވެ. އަދި ކުރިއަށް އޮތް ތަނުގައި މި ޕްލެޓްފޯމް މެދުވެރިކޮށް ލިބޭ ޚިދުމަތްތައް އިތުރަށް ފުޅާކުރުމަކީ ސަރުކާރުގެ ބޮޑު އަމާޒެކެވެ.
ރައީސް މުއިއްޒު ވިދާޅުވި ގޮތުގައި، ޕޭޕަލްގެ ޚިދުމަތް ފެށުމަކީ ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ލިބުނު ވަރަށް ބޮޑު ކުރިއެރުމެކެވެ. އަދި އުރީދޫއާ ގުޅިގެން ޑިޖިޓަލް ޕޭމަންޓްގެ އިތުރު ޚިދުމަތްތައް ތައާރަފުކޮށް، ރާއްޖޭގެ ޑިޖިޓަލް އިގްތިސާދު ވަރުގަދަކުރުމަށް ގިނަ މަސައްކަތްތަކެއް ކުރަމުންދާ ކަމަށްވެސް އެމަނިކުފާނު ވިދާޅުވިއެވެ.
ރާއްޖޭގައި ޕޭޕަލްގެ ޚިދުމަތް ރަސްމީކޮށް ފަށާފައިވަނީ މިއަހަރުގެ ޖޫން 15 ގައެވެ. މި ޚިދުމަތް ބޭނުންކުރެވެނީ އުރީދޫގެ "އެމް-ފައިސާ" ޕްލެޓްފޯމާ ސީމްލެސް އިންޓެގްރޭޝަންއިން ވަރަށް ފަސޭހަކަމާއެކުގައެވެ.
