ދިވެހިރާއްޖެއާއި ސީޝެލްސްއާ ދެމެދު، އޮން-އެރައިވަލް ވިސާގައި 30 ދުވަހުގެ މުއްދަތަށް ދަތުރުކުރެވޭނެ އިންތިޒާމު ހަމަޖެއްސުމުގެ ތާރީޚީ އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި ސޮއިކުރެވުނީ، ސީޝެލްސްގެ ޚާރިޖީ ވަޒީރު ބެރީ ފޯރ މިހާރު ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ބޭއްވުނު ޚާއްޞަ ބައްދަލުވުމެއްގައެވެ.
މި އެއްބަސްވުމާ ގުޅޭގޮތުން ޚާރިޖީ ވަޒީރު އިރުތިޝާމް އާދަމް ވިދާޅުވީ، މެއި މަހުގެ 15 ވަނަ ދުވަހުން ފެށިގެން މި އެއްބަސްވުމަށް އަމަލުކުރަން ފެށުމަކީ ދެ ޤައުމުގެ ގުޅުން އައު ހަރުފަތަކަށް ގެންގޮސްދޭނެ ކަމެއް ކަމަށެވެ. އަދި މި ލުއިފަސޭހައިގެ ސަބަބުން، ދެ ޤައުމުގެ ރައްޔިތުންނަށް ވެސް އެއްވެސް ދަތިކަމެއް ނެތި 30 ދުވަހުގެ މުއްދަތަށް ދަތުރުފަތުރު ކުރުމުގެ ފުރުސަތު ހުޅުވިގެންދާނެކަން ވަޒީރު ފާހަގަކުރެއްވިއެވެ.
ޚާރިޖީ ވުޒާރާއިން ހާމަކުރެއްވި ގޮތުގައި، ސީޝެލްސްގެ ޚާރިޖީ ވަޒީރުގެ މި ދަތުރުފުޅަކީ ދެ ޤައުމުގެ ދެމެދުގައި އޮތް ގާތް ރަހުމަތްތެރިކަން އިތުރަށް ހަރުދަނާވެގެންދާނެ މުހިއްމު ފިޔަވަޅެކެވެ. މީގެ އިތުރުން، ތަރައްޤީވަމުން އަންނަ ކުދި ޖަޒީރާ ޤައުމުތަކެއްގެ ގޮތުގައި، ދެ ޤައުމުގެ މެދުގައި އޮތް އެއްގޮތް ސިފަތަކާއި ބަދަހި ގުޅުން މި އެއްބަސްވުމުން ރަމްޒުކޮށްދޭ ކަމަށްވެސް ވުޒާރާއިން ވިދާޅުވިއެވެ. ވަޒީރު އިރުތިޝާމް އިތުރަށް ވިދާޅުވީ، މި ނިންމުމުގެ ސަބަބުން އިޖުތިމާއީ ގުޅުންތަކުގެ އިތުރުން، ފަތުރުވެރިކަމުގެ ދާއިރާއަށާއި އިޤްތިޞާދީ އިންވެސްޓްމަންޓްތަކަށް އައު ދިރުމެއް ލިބޭނެ ކަމަށް އުންމީދު ކުރައްވާ ކަމަށެވެ. އަދި ދެ ޤައުމުގެ ރައްޔިތުންނަށް އެއް ޤައުމުން އަނެއް ޤައުމުގެ ޤުދުރަތީ ރީތިކަމާއި ކަނޑުފަޅުތަކުގެ ހިތްގައިމުކަން ތަޖުރިބާކުރުމުގެ ފުރުސަތު ފަހިވެގެންދާނެ ކަމަށްވެސް އެކަމަނާ ވިދާޅުވިއެވެ. ދިވެހިރާއްޖެއާއި ސީޝެލްސްއާ ދެމެދު ރަސްމީކޮށް ޚާރިޖީ ގުޅުން ޤާއިމުކޮށްފައިވަނީ 1 ޖުލައި 1980 ގައެވެ. މިއަހަރަކީ ދެ ޤައުމުގެ ދެމެދުގައި އޮތް ބަދަހި ގުޅުމަށް 46 އަހަރު ފުރޭ އަހަރެވެ.🌎 🇲🇻🤝🇸🇨Maldives-Seychelles visa waiver implementation Very pleased to see the Visa Exemption Agreement between the Maldives and Seychelles enter into force today, 15 May 2026, allowing nationals of both countries to travel visa-free for short stays of up to 30 days. The… pic.twitter.com/sufI7MNJjo
— Iruthisham Adam ( Iru) (@IruthishamAdam) May 15, 2026
