އަބޫދާބީ ފަންޑް ފޮރ ޑިވެލޮޕްމަންޓް (އޭ.ޑީ.އެފް.ޑީ) އިން ރާއްޖެއަށް ދޫކޮށްފައިވާ 100 މިލިއަން އެމެރިކާ ޑޮލަރުގެ ލޯނު އަނބުރާ ދެއްކުން ފަސްކޮށްދީފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިކަން ހާމަކުރައްވައި ދެއްކެވި ވާހަކަފުޅުގައި މާލީ ވަޒީރު މޫސާ ޒަމީރު ވިދާޅުވީ، މިއީ 2017 ވަނަ އަހަރު ސަރުކާރުން އަބޫދާބީ ފަންޑަށް ދޫކޮށްފައިވާ ސުކޫކަކާ ގުޅޭ ދަރަންޏެއް ކަމަށެވެ. އެކުވެރި ޢަރަބި ޢިމާރާތް (ޔޫ.އޭ.އީ) އާއެކު ކުރެވުނު މަޝްވަރާތަކަށްފަހު، މި ފައިސާ އަނބުރާ ދެއްކުން ފަސްކުރުމަށް މިހާރު އެއްބަސްވެފައިވާ ކަމަށެވެ.
މި އެއްބަސްވުމުގައި ސޮއިކުރުމުގެ ކަންކަން ކުރިއަށްދާނީ އިލެކްޓްރޯނިކްކޮށް ކަމަށާއި، މި ބަދަލަކީ ސަރުކާރުގެ ޚަރަދުތައް ކުޑަކުރުމަށްޓަކައި ގެނެވުނު ބަދަލެއް ކަމަށް ވަޒީރު ފާހަގަކުރެއްވިއެވެ. އަދި ސަރުކާރުގެ ޚަރަދުތައް މެނޭޖުކުރުމަށް ގިނަ ފިޔަވަޅުތަކެއް އަޅަމުންދާ ކަމަށްވެސް ވަޒީރު ވިދާޅުވިއެވެ.
އަބޫދާބީ ފަންޑުގެ އިތުރުން އެހެން ބައެއް ގައުމުތަކުން ވެސް ވަނީ ދަރަނި ދެއްކުމުގައި ލުއިތަކެއް ދީފައެވެ. އެގޮތުން އިންޑިއާއިން ދަރަނި ދެއްކުން ފަސްކޮށްދީފައިވާއިރު، ޗައިނާއިން ވެސް ވަނީ ލޯނުތައް ދެއްކުމުގައި ލުއި ގޮތްތަކެއް ހަމަޖައްސައިދީފައެވެ.
