އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އެންމެ ބޮޑު އެއް އަމާޒަކީ އެއްވެސް ފަރުދަކު ބާކީ ނުކޮށް، ހުރިހާ ފަރުދުން ހިއްސާވާގޮތަށް ޚިދުމަތް ފޯރުކޮށްދިނުން ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ދެއްކެވި ވާހަކަފުޅުގައި އެ ވުޒާރާގެ މެންޑޭޓުގެ ތެރޭގައި ކުޑަކުދިންނާއި، ޒުވާނުންނާއި، އަންހެނުންނާއި، ދޮށީ އުމުރުގެ މީހުންނާއި، ނުކުޅެދުންތެރިކަން ހުންނަ ފަރާތްތަކުގެ އިތުރުން ނާޒުކު ހާލަތްތަކުގައި ދިރިއުޅޭ އެންމެހާ ފަރާތްތަކަށް ޚިދުމަތް ދިނުން ހިމެނޭކަން ފާހަގަކުރެއްވިއެވެ. އަދި އެފަރާތްތަކަށް ޚިދުމަތް ފޯރުކޮށްދިނުމުގައި އެކަށައަޅަންޖެހޭ ސިޔާސަތުތައް އެކުލަވައިލުމާއި، އެ މަސައްކަތްތައް ވިލަރެސްކުރުމަކީ ވެސް މި ވުޒާރާގެ މައިގަނޑު މަސްއޫލިއްޔަތެއްކަން ވަޒީރުގެ ވާހަކަފުޅުގައި ފާހަގަކުރައްވާފައިވެއެވެ.
"އަޅުގަނޑުމެން ޚިދުމަތް ފޯރުކޮށްދެނީ ނާޒުކު ހާލަތްތަކުގައި ވާ ފަރާތްތަކަށް ވާތީ، އަޅުގަނޑުމެން ބޭނުންވަނީ އެމީހުންނާއި ވަރަށް ގާތުން މަސައްކަތްކުރަން. އެހެންކަމުން، އަޅުގަނޑުމެން ޚިދުމަތް ފޯރުކޮށްދެނީ އެމީހުންގެ ޚިޔާލުތަކަށް ރިޢާޔަތްކުރެވިގެން"، ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، ވުޒާރާގެ ޚިދުމަތްތައް ބައްޓަންކުރެވިފައިވަނީ ވީހާވެސް ވަށާޖެހޭ ގޮތެއްގައި ޚިދުމަތް ފޯރުކޮށްދިނުމަށް ކަމަށެވެ. އެގޮތުން، ރައްޔިތަކަށް ދެރަކަމެއް ނުވަތަ އުނދަގުލެއް ދިމާވެއްޖެ ހާލަތެއްގައި، ހަމައެކަނި ވަގުތީ ހައްލެއް ހޯދައިދިނުމުގެ ބަދަލުގައި، އެ އާއިލާއެއް ބިނާކޮށް އަމިއްލަ ފައިމައްޗަށް ތެދުވުމަށް އެހީތެރިވެދިނުމަކީ ސަރުކާރުގެ މުހިންމު ސިޔާސަތެއްކަމަށްވެސް ވަޒީރު ވިދާޅުވިއެވެ.
މި މަސައްކަތުގެ މައިގަނޑު ބޭނުމަކީ ކޮންމެ ފަރުދަކީވެސް މުޖުތަމަޢެއްގައި ޚިދުމަތް ކުރެވޭނެ ފަދަ ޤާބިލު ބަޔަކަށް ހެދުން ކަމުގައި ވަޒީރު ޑރ. ޢާއިޝަތު ޝިހާމް ވިދާޅުވިއެވެ.
