މިދިޔަ މަހު ބަލިތައް ރިޕޯޓުކުރި މިންވަރު މަދުކަމަށް އެޗްޕީއޭގެ ތަފާސް ހިސާބުތަކުން ދައްކައިފިއެވެ.
މިދިޔަ ޖަނަވަރީ މަހާ އަޅާބަލާއިރު، މިދިޔަ މަހު އަރިދަފުސް ރޯގާއާއި ޑެންގީގެ ކޭސްތައް ހެލްތު ޕްރޮޓެކްޝަން އެޖެންސީ (އެޗްޕީއޭ)އަށް ރިޕޯޓުކުރި މިންވަރު މަދެވެ.
ނަމަވެސް ރޯގާގެ އަލާމާތެއް ފާހަގަވެއްޖެ ނަމަ އަވަހަށް ޑޮކްޓަރަށް ދެއްކުމަށް ސިއްހީ މާހިރުން އިލްތިމާސްކުރެއެވެ. އަދި، ބަލިތަކަށް ރައްކާތެރިކަމުގެ ފިޔަވަޅުތައް ދުރާލާ އެޅުމަށް ވެސް ސިއްހީ އިދާރާތަކުން އަބަދު ވެސް ހަނދާންކޮށްދެއެވެ.
އެޗްޕީއޭގެ ހިސާބުތަކަށް ބަލާއިރު، މިދިޔަ މަހު އަރިދަފުސް ރޯގާ ޖެހިގެން ރިޕޯޓުކުރީ 23،573 ކޭހެވެ. އެއީ، ޖަނަވަރީއާ ބަލާއިރު، 12,120 ކޭސް މަދު އަދަދެކެވެ. މި ގޮތުން، އަރިދަފުސް ރޯގާ އެންމެ އިތުރުވެފައިވަނީ މާލެ ސަރަހައްދުގެ އިތުރަށް ހއ. އަތޮޅާއި ނ. އަތޮޅާއި ބ. އަތޮޅާއި ޅ. އަތޮޅާއި އދ. އަތޮޅާއި ތ. އަދި ޏ. އަތޮޅުގައެވެ.
އޭގެ އިތުރަށް، ނިމުނު ފެބްރުއަރީގައި ޑެންގީ ހުން ޖެހިގެން ރިޕޯޓުކުރި މީހުންގެ އަދަދު ވެސް ވަނީ ދަށަށް ގޮސްފައެވެ. ޖަނަވަރީގައި 668 މީހުން ޑެންގީ ޖެހިގެން ރިޕޯޓުކުރިއިރު، މިދިޔަ މަހު އެ އަދަދު ހުރީ 412 ގައެވެ. އެއީ، ޖަނަވަރީއަށް ވުރެ 256 މީހުން މަދު އަދަދެކެވެ.
