އެފްޑީސީ ފުލެޓުތައް ކުއްޔަށް ދޭނަމަ ބައިލައްކަ ރުފިޔާއިން ޖޫރިމަނާކޮށް ފުލެޓު އަތުލާނެ: ހަމްދާން

ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި އިމާރާތްކޮށްފައިވާ ފުލެޓުތައް ކުއްޔަށް ދޭނަމަ ބައިލައްކަ ރުފިޔާއިން ޖޫރިމަނާކޮށް ފުލެޓު އަތުލާނެ ކަމަށް އެ ކުންފުނީގެ މެނޭޖިންގ ޑިރެކްޓަރ، ހަމްދާން ޝަކީލް ވިދާޅުވެއްޖެއެވެ. ހަމްދާން މިހެން ވިދާޅުވީ އަމާން އުދަރެސްގެ ތިން ކޮޓަރީގެ އެޕާޓްމަންޓެއް ކުއްޔަށް ދޫކުރާ ކަމަށް ބުނެ މީސްމީޑިއާގައި އާންމުކޮށްފައިވާ ޕޯސްޓެއްގެ ސްކްރީންޝޮޓެއް ހިއްސާކޮށް އެކްސްގައި މީހަކު ކަންބޮޑުވުން ފާޅުކުރުމާ ގުޅިގެން ކުރެއްވި ޕޯސްޓެއްގައެވެ.

I was notified of this earlier today and I have already informed my team to look into this. FDC flats are NOT for sub leasing - violates lease agreement with tenant. @Fdc_mv will actively pursue those who are leasing and will fine up to MVR 50,000 and terminate the agreement with… https://t.co/5GdFYJjEGy

— Hamdhan Shakeel (@HamdhanShakeel) March 6, 2026

މިގޮތުން ހަމްދާން ވިދާޅުވީ މި މައްސަލަ މިއަދުގެ ވަގުތެއްގައި ސަމާލުކަމަށް އައުމާ ގުޅިގެން، މިކަން އިތުރަށް ބަލައި ތަޙުޤީޤު ކުރުމަށް މިހާރު ޓީމަށް އަންގާފައިވާނެ ކަމަށެވެ. ހަމްދާން ވިދާޅުވީ އެފްޑީސީ ފުލެޓްތަކަކީ ކުއްޔަށް ހިފާ ފަރާތުން އަލުން އެހެން ބަޔަކަށް ކުއްޔަށް ދޫކުރުން މަނާ ތަންތަން ކަމަށާއި، އެއީ ކުއްޔަށް ހިފާ ފަރާތާއެކު ވެފައިވާ އެއްބަސްވުމާ ކަނޑައެޅިގެން ޚިލާފު ކަމެއް ކަމަށެވެ. އަދި ސޯޝަލް ހައުސިންގް ޔުނިޓްތައް އެހެން ބަޔަކަށް ކުއްޔަށް ދޫކުރާ ފަރާތްތައް ހޯދައި، އެފަރާތްތަކާ މެދު އެފްޑީސީން ހަރުކަށި ފިޔަވަޅު އަޅާނެ ކަމަށާއި، މިގޮތުން އަޅާނެ ފިޔަވަޅުތަކުގެ ތެރޭގައި 50,000 ރުފިޔާއާ ހަމައަށް ޖޫރިމަނާ ކުރުމާއި، ވެފައިވާ އެއްބަސްވުން ބާޠިލުކުރުން ހިމެނޭ ކަމަށްވެސް ހަމްދާން ވިދާޅުވިއެވެ. މީގެ އިތުރުން ހަމްދާން ވިދާޅުވީ ދައުލަތުން ބޮޑު ސަބްސިޑީއެއް ދީގެން ހިންގާ މިފަދަ އިޖުތިމާޢީ ބޯހިޔާވަހިކަމުގެ މަޝްރޫޢުތަކުގެ ބޭނުމަކީ، ބޯހިޔާވަހިކަމަށް އިންތިހާއަށް ބޭނުންވެފައިވާ ރައްޔިތުންނަށް އެ ފުރުޞަތު ފަހިކޮށްދިނުން ކަމަށެވެ. އެހެންކަމުން، މިފަދަ ތަންތަން ވިޔަފާރި އުޞޫލުން ކުއްޔަށް ދޫކޮށް ނަފާ ހޯދުމަކީ މި މަޝްރޫޢުތަކުގެ އަސާސީ މަޤްޞަދު ގެއްލި، ހުރިހާ ދިވެހި ރައްޔިތުންގެ ޙައްޤުތަކަށް އުނިކަން އަންނަ ނާތަހުޒީބު އަމަލެއް ކަމަށް އޭނާ ވިދާޅުވިއެވެ. ހަމްދާން ދަނީ އެންމެންވެސް މިފަދަ ކަންކަމުން ދުރުހެލިވެ، މިއަށްވުރެ ރަނގަޅު ބަޔަކަށް ވުމަށް ގޮވާލައްވައިފައެވެ.