ސަރުކާރު ހިއްސާވާ ކުންފުނިތަކާއި، ސަރުކާރު ބައިވެރިވާ ކުންފުނިތަކާއި، ވިޔަފާރި އުސޫލުން ހިންގާ ސަރުކާރުގެ ތަންތަނުގެ ބޯޑުގެ ސަބް ކޮމިޓީތަކުގެ ނަމޫނާ ޗާޓަރު ހިމެނޭ ގޮތަށް، ބޯޑުގެ ކޮމިޓީތައް އެކުލަވާލާނެ ގޮތުގެ ގައިޑްލައިނެއް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އެކުލަވާލައިފިއެވެ.
ޕީސީބީން ނެރުނު ސަރކިއުލަރއެއްގައި ބުނެފައިވަނީ މިއީ ސަރުކާރުގެ ކުންފުނިތަކާއި ސަރުކާރު ހިއްސާވާ ކުންފުނިތަކާއި، ވިޔަފާރި އުސޫލުން ހިންގާ ސަރުކާރުގެ ތަންތަން ހިންގުން އިތުރަށް ހަރުދަނާކުރުމުގެ މަގު ތަނަވަސްކުރުމުގެ ގޮތުން އެކުލަވާލެވިފައިވާ ގައިޑްލައިނެއް ކަމަށެވެ. އަދި މި ގައިޑްލައިންގެ މަޤުޞަދަކީ ބޯޑުގެ ކޮމިޓީތައް ހަރުދަނާކުރުމާއި، ޕީސީބީން ހުއްދަ ދޮނުމުގައި ބަލާ ކަންކަން ނަމޫނާ ޗާޓަރެއްގައި ހިމަނައި، ހުއްދަ ދިނުމުގެ ކަންކަން އަވަސްކުރުމާއި އަދި ކުންފުނިތަކުން ބޯޑުގެ ކޮމިޓީތަކުގެ ޗާޓަރުތައް އެކުލަވާލުމުގެ މަސައްކަތް އިތުރަށް ފަސޭހަކޮށްދިނުން ކަމަށެވެ.
މީގެ އިތުރުން ޕީސީބީން ބުނީ 'ކޯޑް އޮފް ކޯޕަރޭޓް ގަވަރނަންސް ފޮރ ސްޓޭޓް އޯންޑް އެންޓަޕްރައިޒަސް' އަށް ޢަމަލުކުރަންޖެހޭ އެންމެހައި ކުންފުނިތަކުން މި ގައިޑްލައިނަށާއި، އަދި ނަމޫނާ ޗާޓަރާ އެއްގޮތަށް ކުންފުނީގެ ކޮމިޓީތައް އެކުލަވާލަންވާނެ ކަމަށާއި، އެހެނިހެން ސަރުކާރު ހިއްސާވާ ކުންފުނިތަކުން ބޯޑުގެ ކޮމިޓީތަކުގެ ނަމޫނާ ޗާޓަރާ އެއްގޮތަށް ކުންފުނީގެ ކޮމިޓީތައް އެކުލަވާލުމަށް އިލްތިމާސްކުރާ ކަމަށެވެ.
ޕީސީބީން ބުނީ އެ ބޯޑުގެ ޤާނޫނީ ޒިންމާ އަދާކުރުމުގެ ގޮތުން، އެ ބޯޑުން އަންގާ އެންގުންތަކަށް ކުންފުނިތަކުން ޢަމަލުކުރުމަކީ ސަރުކާރުގެ ކުންފުނިތަކާއި ސަރުކާރު ހިއްސާވާ ކުންފުނިތަކާއި، ވިޔަފާރި އުސޫލުން ހިންގާ ސަރުކާރުގެ ތަންތަނަށް ލާޒިމުކަމެއް ކަމަށެވެ.
