ކަލްކަތާއިން ޝިލޮންގަށް ފުރަން އުޅުނު އިންޑިގޯ އެއާލައިންގެ ފްލައިޓަކަށް ބޮމުގެ އިންޒާރު ލިބުމާ ގުޅިގެން، ފަސިންޖަރުން ބޯޓުން ބާލައި ސަލާމަތީ ކަންކަން ވަރުގަދަކޮށްފިއެވެ.
ހޮނިހިރު ދުވަހުގެ ހެނދުނު ކަލްކަތާ އެއާޕޯޓުން ފުރަން ތައްޔާރުވި މި ފްލައިޓަށް ބޮމުގެ އިންޒާރު ލިބުނުކަން އެއާޕޯޓްގެ ޑިރެކްޓަރު ވަނީ ކަށަވަރުކޮށްދެއްވާފައެވެ. މި ހާދިސާއާ ގުޅިގެން ސަލާމަތީ ބާރުތަކުން މިހާރު ދަނީ ބޯޓު އެއްކޮށް ފާސްކުރަމުންނެވެ.
ކަލްކަތާގެ ނެތާޖީ ސުބާޝް ޗަންދުރަ ބޯސް އިންޓަނޭޝަނަލް އެއާޕޯޓުން މެގަލާޔާގެ ޝިލޮންގަށް ހެނދުނު 9:15 ގައި ފުރަން ހަމަޖެހިފައި އޮތް '6E 7304' ނަންބަރު ފްލައިޓަށް އިންޒާރު ލިބުމާއެކު، ބޯޓު ވަނީ ވަކި ހާއްސަ ސަރަހައްދަކަށް ބަދަލުކޮށްފައެވެ.
ބޮމުގެ އިންޒާރު ލިޔެފައިވާ ކަރުދާސްކޮޅެއް ފެނުނީ ފަސިންޖަރުން ބޯޓަށް އަރަމުން ދިޔަ ވަގުތު، ބޯޓުގެ ފާހަނާ ތެރެއިންނެވެ. އެ ކަރުދާސްކޮޅުގައި ބޯޓުގެ ތެރޭގައި ބޮމެއް އޮތް ކަމަށް ލިޔެފައި އޮތްކަން ކްރޫއިންނަށް ފާހަގަވުމާއެކު، ވަގުތުން ފަސިންޖަރުން ބޯޓުން ބާލައި ރައްކާތެރި ހިސާބަކަށް ވަނީ ގެންގޮސްފައެވެ.
އެއާޕޯޓް ޑިރެކްޓަރު މައުލޫމާތު ދެއްވި ގޮތުގައި، މެންދުރު 12 ޖެހުމާ ހަމައަށްވެސް ބޯޓު ފާސްކުރުމުގެ މަސައްކަތް ދިޔައީ ކުރިއަށެވެ.
މިކަމާ ގުޅިގެން އިންޑިގޯ އެއާލައިންގެ ތަރުޖަމާނު ވިދާޅުވީ، 14 ފެބުރުވަރީ 2026 ގައި ހިނގި މި ހާދިސާއާ ގުޅިގެން ކަމާބެހޭ އިދާރާތަކަށް ވަގުތުން މައުލޫމާތު ހިއްސާކޮށްފައިވާ ކަމަށެވެ.
އަދި ކަނޑައެޅިފައިވާ އުސޫލުތަކުގެ މަތިން ސަލާމަތީ ކަންކަން ފުރިހަމަކުރުމަށްޓަކައި ކަމާބެހޭ ފަރާތްތަކަށް ފުރިހަމަ އެއްބާރުލުން ދެމުންދާ ކަމަށްވެސް އޭނާ ވިދާޅުވިއެވެ.
މީގެ އިތުރުން، ފަސިންޖަރުންނަށް ދިމާވި ދަތިތަކަށްޓަކައި އެ އެއާލައިނުން މައާފަށް އެދޭ ކަމަށާއި، ފަސިންޖަރުންނާއި ކްރޫއިންގެ ސަލާމަތާއި ރައްކާތެރިކަމަކީ އެ އެއާލައިނުން އެންމެ އިސްކަންދޭ ކަންތައް ކަމުގައިވެސް ތަރުޖަމާނު ފާހަގަކުރެއްވިއެވެ.
