ކަނޑު މަގުން ރާއްޖެ އެތެރެކުރަން އުޅުނު 36 ކިލޯގެ މަސްތުވާތަކެތި މޯލްޑިވްސް ކަސްޓަމްސް ސަރވިސް އިން އަތުލައިގެންފިއެވެ.
ކަސްޓަމްސް އިން މިއަދު ހާމަކުރި ގޮތުގައި މި ތަކެތި އަތުލައިގެންފައިވަނީ ފެބުރުވަރީ 12 ވަނަ ދުވަހު މާލޭ ކޮމާޝަލް ހާބަރުންނެވެ.
ކަނޑުމަގުން ރާއްޖެއަށް ގެނައި މުދާ ޝިޕްމެންޓެއް، 12 ފެބުރުވަރީ 2026 ވަނަ ދުވަހު ބަލައިފާސްކުރުމުގެ ތެރޭގައި، މަސްތުވާތަކެތިކަމަށް ޝައްކުކުރެވޭ ތަކެތި ވަނީ ފެނިފައި. ފުރަތަމަ މަރުޙަލާގެ ޓެސްޓުތަކުން މިތަކެތި ވަނީ ހަޝިޝް އޮއިލްއަށް ޕޮޒިޓިވްވެފައި. pic.twitter.com/QLXrA3HgT0
— Maldives Customs Service (@CustomsMv) February 14, 2026
މިގޮތުން ޖުމުލަ 36.43 ކިލޯގުރާމުގެ ހަޝިޝް އޮއިލް ވަނީ އަތުލައިގެންފައެވެ. މި ތަކެތީގެ މަގުމަތީ އަގު 29 މިލިއަން ރުފިޔާއަށް އަށްވުރެ ބޮޑު ކަމަށް ކަސްޓަމްސް އިން ހާމަކުރެއެވެ.
ނަމަވެސް މި މައްސަލައާ ގުޅިގެން ބަޔަކު ހައްޔަރުކުރި ކަމެއް އަދި ނޭނގެއެވެ.
މަސްތުވާއެއްޗެއް ދިވެހިރާއްޖެއަށް އެތެރެކުރުން ނުވަތަ ދިވެހިރާއްޖެއިން ބޭރުކުރުމުގެ ކުށުގެ އަދަބު ބޮޑުކޮށް، ވަކި ޝަރުޠުތަކެއް ފުރިހަމަވާނަމަ، އެމީހެއްގެ އަދަބަކީ މަރުގެ އަދަބު ކަމަށް ކަނޑައަޅައި، މަސްތުވާތަކެއްޗާބެހޭ ޤާނޫނަށް 3 ވަނަ އިޞްލާޙު ގެނައުމުގެ ބިލު ރައީސް ޑރ. މުޙައްމަދު މުޢިއްޒު ތަޞްދީޤުކުރެއްވީ މިދިޔަ ޑިސެންބަރު މަހުގެ 6 ވަނަ ދުވަހުއެވެ.
