ފްރާންސްގެ މަޝްހޫރު ފުޓްބޯޅަ ތަރި ކަރީމް ބެންޒެމާ، ސައުދީ ޕްރޯ ލީގުގެ އަލް-އިއްތިހާދު ދޫކޮށް އެ ލީގުގެ އެއްވަނައިގައި އޮތް އަލް-ހިލާލާ ހޯމަ ދުވަހު ގުޅިއްޖެއެވެ. މި ބަދަލަކީ ކްރިސްޓިއާނޯ ރޮނާލްޑޯ ކުޅެމުންދާ އަލް-ނަސްރުން ލީގު ކާމިޔާބު ކުރުމަށް ކުރަމުންދާ އުންމީދުތަކަށް ކުރިމަތިވި ބޮޑު ގޮންޖެހުމެއް ކަމަށް ބެލެވެއެވެ.
ބެލޮންޑިއޯ ކާމިޔާބުކޮށްފައިވާ ބެންޒެމާ ގުޅުނު އަލް-ހިލާލް މިވަގުތު އޮތީ ރޮނާލްޑޯގެ އަލް-ނަސްރަށްވުރެ އެއް ޕޮއިންޓް ކުރީގައި ލީގު ތާވަލުގެ އެއްވަނައިގައެވެ. 2022 ވަނަ އަހަރު ސައުދީއަށް ބަދަލުވި ފަހުން ރޮނާލްޑޯ އަދިވެސް ހުރީ ލީގު ތަށީގެ އިންތިޒާރުގައެވެ. ނަމަވެސް، ރެއާލް މެޑްރިޑުގައި ރޮނާލްޑޯއާއެކު ކުޅުނު ބެންޒެމާ އަލް-ހިލާލާ ގުޅުމުން، ރޮނާލްޑޯގެ އެންމެ ބޮޑު ވާދަވެރި ޓީމު މިވަނީ އިތުރަށް ވަރުގަދަވެފައެވެ.
އަލް-ހިލާލަކީ ސައުދީ އަރަބިއްޔާގެ އެންމެ ކާމިޔާބު ކްލަބެވެ. އެ ޓީމުން ވަނީ 21 ފަހަރު ލީގު ކާމިޔާބުކޮށް، ހަތަރު ފަހަރު އޭޝިއާގެ ޗެމްޕިއަންކަން ހޯދާފައެވެ. މީގެ އިތުރުން، މިދިޔަ އަހަރުގެ ކްލަބް ވޯލްޑް ކަޕްގައި މެންޗެސްޓާ ސިޓީ 4-3 އިން ބަލިކޮށް އެ ޓީމުން ވަނީ ދުނިޔެ ސިއްސުވާލާފައެވެ. މިހާރު ސިމޯން އިންޒާގީގެ އިރުޝާދުގެ ދަށުން ކުޅެމުންދާ އަލް-ހިލާލުން އަންނަނީ ބޮޑެތި ތަރިން އެ ޓީމަށް ގެންނަމުންނެވެ.
ބެންޒެމާ އަލް-ހިލާލާ ގުޅުނުއިރު، އަލް-ނަސްރުން ކުޅުންތެރިން ގަތުމުގައި ދައްކަމުންދާ ދޯދިޔާކަމާ މެދު ރޮނާލްޑޯ ހިތްހަމަނުޖެހިފައި ހުރި ކަމުގެ ރިޕޯޓްތަކެއް ވަނީ ފެންމަތިވެފައެވެ. އަލް-ހިލާލް، އަލް-އިއްތިހާދު އަދި އަލް-ނަސްރުގެ މެޖޯރިޓީ ހިއްސާ އޮންނަނީ ސައުދީ ޕަބްލިކް އިންވެސްޓްމަންޓް ފަންޑު (PIF) އަތުގައެވެ.
މީގެ ކުރިން ނޭމާ ފަދަ ތަރިން ގެނެސްފައިވާ އަލް-ހިލާލުން ވަނީ ކީލިއަން އެމްބާޕޭ އާއި ބްރޫނޯ ފެނާންޑޭޒް ހޯދުމަށްވެސް މަސައްކަތް ކޮށްފައެވެ.
