އަދާލަތު ޕާޓީގެ ރައީސްކަމަށް ޝައިޚް މުޙައްމަދު ޝިފާން

އަދާލަތު ޕާޓީ (އޭޕީ) ގެ ހަތަރު ވަނަ ދައުރުގެ ރައީސްކަމަށް، ޝައިޚް މުޙައްމަދު ޝިފާން އިންތިޚާބުވެއްޖެއެވެ. ޝައިޚް ޝިފާން އޭޕީގެ ރައީސްކަމަށް ހޮވިވަޑައިގެންނެވީ "ފަހި ވޯޓު" މެދުވެރިކޮށް އިއްޔެ ކުރިއަށްގެންދިޔަ އިންތިޚާބުގައި %99 ވޯޓު ހޯއްދަވައިގެންނެވެ. ޝެއިޚް ޝިފާން އާ ވާދަކުރެއްވި އަލްއުސްތާޟު އިކްރާމް ޢަބްދުއްސައްޠާރަށް ލިބިވަޑައިގެންނެވީ %1 ވޯޓެވެ. މިއާއެކު އޭޕީގެ ނައިބު ރައީސްކަމަށް ހޮވިވަޑައިގެންފައިވަނީ ޝެއިޚް ޝިފާންގެ ރަނިންގ މޭޓު ގޮތުގައި ވާދަކުރެއްވި ޝައިޚް ޢަބްދުالله ރަޝީދެވެ. އޭޕީގެ ރައީސް ކަމަށް ޝައިޚް ޝިފާން އިންތިޚާބުވެވަޑައިގެންނެވުމާ ގުޅިގެން އެ ޕާޓީގެ މިހާރުގެ ރައީސް، ޝައިޚް އިމްރާން ޢަބްދުﷲ އެކްސްގައި ކުރެއްވި ޕޯސްޓެއްގައި ވަނީ ޝިފާން އަދި ނައިބު ރައީސް ކަމަށް ހޮވިވަޑައިގެންނެވި ޝައިޚް ޢަބްދުﷲ ރަޝީދަށް މަރުޙަބާ ދަންނަވައިފައެވެ.

ޢަދާލަތު ޕާޓީގެ ހަތަރުވަނަ ދައުރުގެ ރައީސް ކަމަށް ހޮވި ވަޑައިގެންނެވި އަލް އަޚް ޝައިޚް މުހަންމަދު ޝިފާން @shifan7 އަދި ނައިބު ރައީސް ކަމަށް ހޮވިވަޑައިގެންނެވި އަލްއަޚް ޝައިޚް ޢަބްދު الله ރަޝީދު @Abdulla_Rshyd ހޯއްދެވި ފުރިހަމަ ކާމިޔާބީއަށް ވަރަށް ހޫނު މަރުހަބާއެއް ދަންނަވަން،…

— Imran Abdulla (@ShimranAb) January 31, 2026

އިމްރާން ވިދާޅުވީ އިރާދަކުރެއްވިއްޔާ ޢަދާލަތު ޕާޓީގެ ދުސްތޫރާ އެއްގޮތަށް ކޮންގްރެސް ބާއްވާއް ދައުރު ބަދަލުކުރުމުގެ އެންމެހައި އިންތިޒާމުތައް ހަމަޖެއްސުމުގައި ފުރިހަމަ އެއްބާރުލުން ދެއްވާނެ ކަމަށެވެ. "މާތް الله ތިޔަ ދެބޭފުޅުންގެ ލީޑަރޝިޕްގެދަށުން ޢަދާލަތު ޕާޓީ އާ އުސް ހަރުފަތްތަކަކަށް ގެންދިއުމުގެ ހެޔޮ ތައުފީޤް މިންވަރު ކޮށްދެއްވާށި"، އިމްރާންގެ ޕޯސްޓުގައި ވިދާޅުވެފައިވެއެވެ.