ދެ އަހަރަށްވުރެ ގިނަ ދުވަސްވަންދެން ހުއްޓުމެއްނެތި ޣައްޒާއަށް ބޮންއަޅައި ދެމުންދާ ހަމަލާތަކަށްފަހު، ފަލަސްތީނުގެ ސިއްހަތާ ބެހޭ ވުޒާރާއިން ނެރެމުންދާ މަރުގެ ތަފާސްހިސާބުތަކަކީ ސައްހަ ހިސާބުތަކެއްކަން އިޒްރޭލުގެ އަސްކަރިއްޔާއިން ގަބޫލުކޮށްފިއެވެ.
7 އޮކްޓޫބަރު 2023 ގައި އިސްރާއީލުން ފެށި ނަސްލު ނައްތާލުމުގެ ހަނގުރާމައަށްފަހު، ޣައްޒާގެ ކަމާބެހޭ އިދާރާތަކާއި، ފަލަސްތީނުގެ ރައްޔިތުންނާއި ނޫސްވެރިން ހާމަކުރަމުންދިޔަ މަރުގެ ތަފާސްހިސާބުތަކާއި ލިބެމުންދިޔަ ގެއްލުންތައް އިޒްރޭލުން ދިޔައީ ތަކުރާރުކޮށް ދޮގުކުރަމުންނެވެ. އަދި ފަލަސްތީނުން ހިސާބުތައް އޮޅުވާލައި، މަރުވާ މީހުންގެ އަދަދު އިތުރުކޮށް ދައްކަނީ ކަމަށް ބުނެ ތަފާތު ތުހުމަތުތައް ވެސް ދިޔައީ ކުރަމުންނެވެ.
ނަމަވެސް، މިދިޔަ ބުރާސްފަތި ދުވަހު އިސްރާއީލުގެ އަސްކަރީ އޮފިޝަލަކު ނޫސްވެރިންނަށް މައުލޫމާތު ދެމުން ބުނެފައިވަނީ، ގައްޒާގައި 70،000 އެއްހާ މީހުން މަރުވެފައިވާކަން އަސްކަރިއްޔާއިން މިހާރު ގަބޫލުކުރާ ކަމަށެވެ. ޣައްޒާގެ ސިއްހަތާ ބެހޭ ވުޒާރާގެ ހިސާބުތަކުން ދައްކާ ގޮތުގައި، މި އަހަރުގެ ޖަނަވަރީ 27 އާ ހަމައަށް 71،662 މީހުން ވަނީ ޝަހީދުވެފައެވެ. މީގެ ތެރެއިން 488 މީހުން ޝަހީދުވެފައިވަނީ 10 އޮކްޓޫބަރު 2025 ގައި ގައްޒާގައި ހަނގުރާމަ ހުއްޓާލުމަށް އިއުލާނުކުރި ފަހުންނެވެ.
މީގެ އިތުރުން، އެތައް ހާސް ބަޔަކު ގެއްލިފައިވާއިރު، ބެލެވޭ ގޮތުގައި އެ މީހުން ވަނީ ވެއްޓިފައިވާ އިމާރާތްތަކުގެ ކުނިތަކުގެ ދަށުގައި ތާށިވެފައެވެ. ގެއްލިފައިވާ މީހުންގެ މައްސަލަތައް ބަލާ ގައުމީ ކޮމިޓީން ލަފާކުރާ ގޮތުގައި އެ އަދަދު 10،000 އަށްވުރެ މައްޗަށް އަރާނެއެވެ. ހަމައެއާއެކު، ބަނޑުހައިހޫނުކަމުގެ ސަބަބުން މަދުވެގެން 440 މީހުން މަރުވެފައިވާ ކަމަށް ސިއްހަތާ ބެހޭ ވުޒާރާއިން ބުނެއެވެ.
އިޒްރޭލުގެ އަސްކަރީ އޮފިޝަލް މި އަދަދުތައް ގަބޫލުކުރި ނަމަވެސް، ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންކަން ފާހަގަކޮށްފައެއް ނުވެއެވެ. އަދި ބަނޑަށް މަރުވި މީހުންނާއި ކުނިތަކުގެ ދަށުގައި ތާށިވެފައިވާ މީހުންގެ ވާހަކަވެސް އޭނާ ދައްކާފައެއް ނުވެއެވެ.
އެހެންނަމަވެސް، ފަލަސްތީނުގެ ހިސާބުތައް އިޒްރޭލުން ގަބޫލުކުރުމަކީ މީގެ ކުރިން އެ ގައުމުން ގެންގުޅުނު އުސޫލުތަކާ ހިލާފު ކަމެކެވެ. މިއީ އިޒްރޭލުން އާންމުކޮށް ކަންކަން ކުރާ ގޮތެވެ. އެ ގައުމުގެ އަސްކަރިއްޔާއިން ހިންގާ ގަތުލުއާންމުތަކާއި ޖަރީމާތައް ފުރަތަމަ އިންކާރު ކުރި ނަމަވެސް، ހަގީގަތް ފޮރުވަން އުނދަގޫވާ ދަރަޖައަށް ހެކިތައް ފެންނަން ފެށުމުން، މާ ފަހުން އެކަންކަމަށް އިއުތިރާފުވެއެވެ.