ފެނަކައިގެ ނަމުގައި ބިލުތަކުން ސަބްސިޑީ ދޭނެ ކަމަށް ބުނެ ފޮނުވަމުންދާ ލިންކުތަކަށް ސަމާލުވުމަށް ފެނަކަ ކޯޕަރޭޝަން ލިމިޓެޑުން އިލްތިމާސްކޮށްފިއެވެ.
މިގޮތުން ފެނަކައިން މިއަދު ވަނީ އެ ކުންފުނީގެ ނަމުގައި އޮޅުވާލައިގެން ފައިސާ ހޯދުމަށް ލިންކެއް ނުވަތަ ކޯލެއް ލިބިއްޖެނަމަ ލަސްނުކޮށް ކަމާބެހޭ ފަރާތްތަކަށް އަވަހަށް ރިޕޯޓުކުރުމަށް އެދިފައެވެ.
މި މަހުގެ ކުރީކޮޅު ފެނަކައިން ވަނީ އެ ކުންފުނިން ދޭ ޚިދުމަތްތަކުގެ ބިލުތަކުން ސަބްސިޑީ ދޭނެ ކަމަށް ބުނެ، އެ ކުންފުނީގެ ނަމުގައި ސޯޝަލް މީޑިއާގައި ޕޭޖެއް ހިންގަމުންދާކަމުގެ މަޢުލޫމާތު ލިބިފައިވާ ކަމަށާއި، އެފަދަ ޕޭޖުތައް ހިންގުމުގައި އެ ކުންފުނީގެ އެއްވެސް ބައިވެރިވުމެއް ނެތް ކަމަށް ބުނެފައެވެ.
މީގެ އިތުރުން ފެނަކައިން ބުނީ އެ ކުންފުނިން އެއްވެސް އަމިއްލަ ފަރާތަކަށް ލިންކް ފޮނުވައިގެންވެސް އަދި އެފަދަ އެހެން ގޮތަކަށް ނަމަވެސް ފައިސާގެ މުޢާމަލާތްތަކެއް ނުކުރާނެ ކަމަށެވެ.
އަދި އެ ކުންފުނިން ފައިސާގެ މުޢާމަލާތްތައް ހިންގާނީ އެ ކުންފުނީގެ ނަމުގައި ހަދާފައިވާ ރަސްމީ އެކައުންޓްތަކުން އެކަނި ކަމަށްވެސް ފެނަކައިން ބުންޏެވެ.
އެހެންކަމުން އޮޅުވާލައިގެން ފައިސާ ހޯދުމަށް ހިންގާ މިފަދަ ކަންތައްތަކަށް ސަމާލުވެ، އެފަދަ ލިންކެއް ނުވަތަ ކޯލެއް އައިސްފިނަމަ ކަމާބެހޭ ފަރާތްތަކަށް ވީހާވެސް އަވަހަކަށް ރިޕޯޓުކުރުމަށް ފެނަކައިން ވަނީ އެދިފައެވެ.
