ފެނަކައިގެ ނަމުގައި ބިލުތަކުން ސަބްސިޑީ ދޭނެ ކަމަށް ބުނެ ހިންގަމުންދާ ޕޭޖާމެދު ސަމާލުވުމަށް ފެނަކަ ކޯޕަރޭޝަން ލިމިޓެޑުން އިލްތިމާސްކޮށްފިއެވެ.
ފެނަކައިން ނެރުނު ނޫސްބަޔާނެއްގައި ބުނެފައިވަނީ އެ ކުންފުނިން ދޭ ޚިދުމަތްތަކުގެ ބިލުތަކުން ސަބްސިޑީ ދޭނެ ކަމަށް ބުނެ، އެ ކުންފުނީގެ ނަމުގައި ސޯޝަލް މީޑިއާގައި ޕޭޖެއް ހިންގަމުންދާކަމުގެ މަޢުލޫމާތު ލިބިފައިވާ ކަމަށާއި، އެފަދަ ޕޭޖުތައް ހިންގުމުގައި އެ ކުންފުނީގެ އެއްވެސް ބައިވެރިވުމެއް ނެތް ކަމަށެވެ.
މީގެ އިތުރުން ފެނަކައިން ބުނީ އެ ކުންފުނިން އެއްވެސް އަމިއްލަ ފަރާތަކަށް ލިންކް ފޮނުވައިގެންވެސް އަދި އެފަދަ އެހެން ގޮތަކަށް ނަމަވެސް ފައިސާގެ މުޢާމަލާތްތަކެއް ނުކުރާނެ ކަމަށެވެ.
އަދި އެ ކުންފުނިން ފައިސާގެ މުޢާމަލާތްތައް ހިންގާނީ އެ ކުންފުނީގެ ނަމުގައި ހަދާފައިވާ ރަސްމީ އެކައުންޓްތަކުން އެކަނި ކަމަށްވެސް ފެނަކައިން ބުންޏެވެ.
އެހެންކަމުން އޮޅުވާލައިގެން ފައިސާ ހޯދުމަށް ހިންގާ މިފަދަ ކަންތައްތަކަށް ސަމާލުވެ، އެފަދަ ލިންކެއް ނުވަތަ ކޯލެއް އައިސްފިނަމަ ކަމާބެހޭ ފަރާތްތަކަށް ވީހާވެސް އަވަހަކަށް ރިޕޯޓުކުރުމަށް ފެނަކައިން ވަނީ އެދިފައެވެ.