އޮމާންގެ ވެރިރަށް މަސްކަޓް ކައިރިން ފަތުރުވެރިން ގޮވައިގެން ދަތުރުކުރި އުޅަނދެއް ބަންޑުން ޖަހާލައި ފަރަންސޭސިވިލާތުގެ ތިން ފަތުރުވެރިން މަރުވެއްޖެ ކަމަށް އެ ގައުމުގެ ފުލުހުން ހާމަކޮށްފިއެވެ.
ރޯޔަލް އޮމާން ޕޮލިހުން ބުނި ގޮތުގައި، ގަލްފް އޮފް އޮމާން އަށް މި އުޅަނދު ބަންޑުން ޖަހާލިއިރު އޭގައި ފަރަންސޭސިވިލާތުގެ 25 ފަތުރުވެރިންނާއި، ގައިޑަކާއި ކެޕްޓަނަކު ތިއްބެވެ. މި ހާދިސާގައި ތިން މީހަކު މަރުވެފައިވާއިރު، އިތުރު ދެ މީހަކަށް ކުދި އަނިޔާތަކެއް ލިބިފައިވާ ކަމަށް ފުލުހުން ބުންޏެވެ.
ފުލުހުން ނެރުނު ކުރު ބަޔާނެއްގައި ބުނެފައިވަނީ، މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ކުރަންޖެހޭ ތަހުގީގުތައް މިހާރު ކުރިއަށްދާ ކަމަށެވެ.
މި އުޅަނދު ބަންޑުން ޖަހާލާފައިވަނީ ސުލްޠާން ގާބޫސް ބަނދަރާ ގާތްގަނޑަކަށް 2.5 ނޯޓިކަލް މޭލު ބޭރުންނެވެ.
ލޯކަލް މީޑިއާތަކުން ރިޕޯޓްކޮށްފައިވާ ގޮތުގައި، މި އުޅަނދަކީ މަސްކަޓުގެ ހުޅަނގު އުތުރުގައި އޮންނަ، ފީނުމަށް މަޝްހޫރު "ދިމާނިޔާތު އައިލެންޑްސް" އަށް ދަތުރުކުރި އުޅަނދެކެވެ. މި ސަރަހައްދަކީ ކަނޑުއަޑީގެ ރީތި މާހައުލެއް އޮންނަ، ފަތުރުވެރިންގެ މެދުގައި ވަރަށް މަގުބޫލު ތަނެކެވެ.
މި ހާދިސާއާ ގުޅޭގޮތުން ފަރަންސޭސިވިލާތުގެ ފޮރިން މިނިސްޓްރީން އަދި ވަކި އެއްޗެއް ހާމަކޮށްފައެއް ނުވެއެވެ.
ޢަރަބި ކަނޑުގެ އައްސޭރީގައި އޮންނަ އޮމާނަކީ، އެ ގައުމުގެ ފަރުބަދަތަކާއި، ގޮނޑުދޮށްތަކާއި، ކަނޑުއަޑީގެ ގުދުރަތީ ރީތިކަމުގެ ސަބަބުން ދުނިޔޭގެ އެކި ކަންކޮޅުތަކުން ފަތުރުވެރިންގެ ޝައުގުވެރިކަން އިތުރުވަމުން އަންނަ ގައުމެކެވެ.
އެގޮތުން 2024 ވަނަ އަހަރު ގާތްގަނޑަކަށް 4 މިލިއަން ފަތުރުވެރިން އެ ގައުމަށް ޒިޔާރަތްކޮށްފައިވާއިރު، އޮމާން ސަރުކާރުގެ އަމާޒަކީ ދެމެހެއްޓެނިވި ފަތުރުވެރިކަމަށް އިސްކަންދީގެން 2040 ވަނަ އަހަރު އަންނަންވާއިރަށް މި އަދަދު ތިން ގުނައަށް އިތުރުކުރުމެވެ.