ރާއްޖޭގައި ފުރަތަމަ ފަހަރަށް އެކުލަވާލާ "ކްލައިމެޓް ޗޭންޖް ޖެންޑަރ އެކްޝަން ޕްލޭން" (CC-GAP) އެކުލަވާލުމުގެ މަސައްކަތް ފެށުމަށްޓަކައި ބާއްވާ "އިންސެޕްޝަން ވޯކްޝޮޕް" ބާއްވައިފިއެވެ.
މި މަސައްކަތު ބައްދަލުވުމަކީ މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ކްލައިމެޓް ޗޭންޖް ޑިޕާޓްމަންޓުން އިންތިޒާމުކޮށްގެން ކުރިއަށް ގެންދިޔަ ބައްދަލުވުމެކެވެ. މި ބައްދަލުވުން ރަސްމީކޮށް ހުޅުއްވައިދެއްވީ މިނިސްޓަރ އޮފް ސްޓޭޓް ފޯ ޓޫރިޒަމް އެންޑް އެންވަޔަރަންމަންޓް އިބްރާހީމް މިމްރާހެވެ.
ސްޓޭޓް މިނިސްޓަރ މިމްރާހުގެ ވާހަކަފުޅުގައި، މޫސުމީ ބަދަލުތަކުން އަރައިގަތުމަށް ގައުމީ ފެންވަރުގައި ކުރެވޭ މަސައްކަތްތައް ހަރުދަނާކުރުމަށް މިނިސްޓްރީން ކުރަމުންދާ މަސައްކަތްތަކަށް އަލިއަޅުއްވާލެއްވިއެވެ. މިގޮތުން "ނޭޝަނަލް އެޑަޕްޓޭޝަން ޕްލޭން" އެކުލަވާލުމާއި، ރާއްޖޭގެ ތިންވަނަ "ނޭޝަނަލީ ޑިޓަރމިންޑް ކޮންޓްރިބިއުޝަން" (NDC) ތަންފީޒުކުރުމަށް ކުރެވޭ މަސައްކަތްތައް ފާހަގަކުރެއްވިއެވެ.
ކްލައިމެޓް ޗޭންޖް ޑިޕާޓްމަންޓްގެ ޑައިރެކްޓަރ ތިބްޔާން އިބްރާހީމް ވަނީ މި ވޯކްޝޮޕްގެ މަގްސަދުތަކާ ގުޅޭގޮތުން މައުލޫމާތު ދެއްވާފައެވެ. އޭނާ ވިދާޅުވި ގޮތުގައި، މި އެކްޝަން ޕްލޭނަކީ މޫސުމީ ބަދަލުތަކަށް އިންތިޒާމުވެގެން ކުރެވޭ މަސައްކަތްތަކުގެ ތެރޭގައި ޖެންޑަރ ނުވަތަ މިންތީގެ ހަމަހަމަކަން ނިޒާމީ ގޮތެއްގައި ހިމެނުމަށް މަގުފަހިވެގެންދާނެ މުހިންމު އޮނިގަނޑެކެވެ.
Inception Workshop held to initiate the development of Maldives’ first Climate Change Gender Action Plan (CC-GAP), advancing inclusive and gender-responsive climate action.
News: https://t.co/TTS3W4E6IL#ClimateAction #climate #GenderEquality #Maldives pic.twitter.com/tiudeYq16d
— Ministry of Tourism and Environment (@MoTmv) January 26, 2026
ސީނިއަރ ކްލައިމެޓް ޗޭންޖް އެޑަޕްޓޭޝަން ކޮންސަލްޓަންޓް ޖައުޒާ ޚަލީލް ފެސިލިޓޭޓް ކުރެއްވި މި ވޯކްޝޮޕްގައި ސަރުކާރުގެ އެކި ވުޒާރާތަކުންނާއި މަދަނީ ޖަމިއްޔާތަކުން ޖުމްލަ 32 ބައިވެރިން ބައިވެރިވިއެވެ. މީގެ ތެރޭގައި ރައީސުލްޖުމްހޫރިއްޔާގެ އޮފީހުގެ މޫސުމީ ބަދަލުތަކާ ބެހޭ ޚާއްޞަ މަންދޫބުގެ އޮފީހާއި، އެކި މިނިސްޓްރީތަކާއި، އދ. ގެ އިދާރާތައް ކަމަށްވާ ޔޫ.އެން.ޑީ.ޕީ އަދި ޔުނިސެފް ހިމެނެއެވެ.
ވޯކްޝޮޕްގެ ބައިވެރިން ވަނީ މޫސުމީ ބަދަލުތަކުގެ ސަބަބުން އަންހެނުންނާއި ފިރިހެނުންނަށް ކުރާ ތަފާތު އަސަރުތަކާއި، މިހާރު ހުރި ސިޔާސަތުތަކުގައި ހުރި ހުސްތަންތަން ދެނެގަތުމަށް މަޝްވަރާކޮށްފައެވެ. އަދި މި ޕްލޭންގެ ދަށުން އިސްކަންދޭނެ ދާއިރާތަކާއި ކުރާނެ ކަންކަން ކަނޑައެޅުމުގެ މަސައްކަތްވެސް ކުރިއަށް ގެންގޮސްފައިވެއެވެ.