މޯލްޑިވްސް ކަރެކްޝަނަލް ސަރވިސް (އެމްސީއެސް) ގެ ހިންގުން ހަރުދަނާކުރުމަށާއި އޮފިސަރުންނާއި މުވައްޒަފުން ތަރައްޤީކުރުމަށް ބްރިޓިޝް ހައި ކޮމިޝަން އިން ތައްޔާރުކުރި ޓްރޭނިންގ މޮޑިއުލްތަކާއި ކޮމްޕިޓެންސީ ފްރޭމްވަރކް ރަސްމީކޮށް މިއަދު ޙަވާލުކޮށްފިއެވެ.
މިކަމަށްޓަކައި މިއަދު ބޭއްވި ޚާއްސަ ރަސްމިއްޔާތުގައި، ކޮމިޝަނަރ އޮފް ޕްރިޒަންސް ޙަސަން ޒަރީރާ މި ތަކެތި ހަވާލުކޮށްދެއްވީ އިނގިރޭސިވިލާތުން ދިވެހިރާއްޖެއަށް ކަނޑައަޅުއްވާފައިވާ ހުންނަވާ ހައި ކޮމިޝަނަރ، ހިޒް އެކްސަލަންސީ ނިކޮލަސް ޑޭވިޑް ލޯއެވެ.
މި ރަސްމިއްޔާތުގައި ޕްރިޒަން ކޮމްޕޯނަންޓް ލީޑް ޑރ ޝޭން ބްރާޔަންސް އާއި ކަރެކްޝަންސްގެ ސީނިއަރ މެނޭޖްމަންޓް ވަނީ ބައިވެރިވެ ވަޑައިގަންނަވާފައެވެ.
މީގެ އިތުރުން ހައި ކޮމިޝަނަރ ވަނީ “ޓްރާންސްފޮރމޭޝަނަލް ލީޑަރޝިޕް އިން އެކްޝަން ޓްރޭނިންގ” ޕްރޮގްރާމް ފުރިހަމަ ކުރެއްވި ފަރާތްތަކަށް ސެޓްފިކެޓް ޙަވާލުކޮށްދެއްވާފައެވެ.
ކަރެކްޝަންސް އިން ހާމަކުރާ ގޮތުގައި މިއީ ބްރިޓިޝް ހައި ކޮމިޝަންގެ މޯލްޑިވްސް ސެކިއުރިޓީ އެންޑް ޖަސްޓިސް ޕްރޮޖެކްޓްގެ ދަށުން، ޓެޓްރާޓެކް އިންޓަރނޭޝަނަލްއިން މެދުވެރިކޮށް އެމްސީއެސްގެ ހިންގުމާއި މަސައްކަތްތައް ހަރުދަނާކޮށް، އޮފިސަރުންނާއި މުވައްޒަފުން ތަރައްޤީކޮށް، ޤާބިލު ބަޔަކު ތަމްރީނުކުރުމަށް ދެވޭ ޓެކްނިކަލް އެހީތެރިކަމުގެ ތެރެއިން ބައެކެވެ.
އަދި މި ޕްރޮޖެކްޓްގެ ދަށުން، 23 ވަރކްޝޮޕް އަދި ޓްރޭނިންގތައް ހިންގުމާއި 86 ރެކަމެނޑޭޝަނާއި 08 އެސެސްމަންޓް އަދި 10 ރިޕޯރޓް ހެދުމުގެ އިތުރުން 12 ޓްރޭނިންގ މޮޑިއުލް ތައްޔާރުކޮށްފައިވާ ކަމަށާއި، މި ޕްރޮޖެކްޓްގެ ދަށުން ކުރިއަށް ގެންދިޔަ ސްޓްރެޓީޖިކް އެކްޝަން ޕްލޭން ވަރކްޝޮޕް އާއި ލީޑިރޝިޕްގެ އެކި ޓްރޭނިންގތަކާއި ޕްރިޒަން ސެކިއުރިޓީ، ރިހެބިލިޓޭޝަން ޕްރޮގްރާމްތަކާއި އެޗްއާރް ޕޮލިސީތަކާއި އުސޫލުތައް އަދި އެޕްރައިޒަލް ސިސްޓަމް ފަދަ ތަމްރީންތަކާއި ވަރކްޝޮޕްތަކުގައި ކަރެކްޝަންސްގެ 270 އޮފިސަރުންނާއި މުވައްޒަފުން ބައިވެރިވެފައިވާ ކަމަށްވެސް ކަރެކްޝަންސް އިން ބުނެއެވެ.