ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ނަމުގައި އޮޅުވާލައިގެން ކުރާ ކޯލްތަކާއި މެސެޖުތަކަށް ސަމާލުވުމަށް އިލްތިމާސްކޮށްފިއެވެ.
އެޗްޑީސީން މިއަދު ވަނީ އެ ކުންފުނީގެ ނަމުގައި ވައިބަރ، އެސްއެމްއެސް އަދި އާދައިގެ ފޯނު ކޯލުތައް މެދުވެރިކޮށް އޮޅުވާލައިގެން މަޢުލޫމާތު ހޯދުމަށް ކުރަމުންދާ މަސައްކަތްތަކަށް ސަމާލުވުމަށް އާންމުންނަށް އިލްތިމާސްކޮށްފައެވެ.
އެޗްޑީސީގެ ނަމުގައި އޮޅުވާލައިގެން ކުރާ ކޯލްތަކާއި މެސެޖުތަކަށް ސަމާލުވުމަށާއި، އެއްވެސް ފަރާތަކަށް އަމިއްލަ މައުލޫމާތު ނުވަތަ ފައިސާގެ މުއާމަލާތެއް ނުހިންގުމަށް އިލްތިމާސްކުރަން!#WithHDC pic.twitter.com/YOsnPMcu8e
— Housing Development Corporation (@hdcmaldives) January 24, 2026
މީގެ އިތުރުން، ހައުސިންގ މަޝްރޫޢުތަކާއި، ސޯޝަލް ހައުސިންގ ނުވަތަ ފުލެޓުތަކާ ގުޅޭ އެއްވެސް މުޢާމަލާތެއް ކުރުމަށް އެ ކުންފުނިން ވައިބަރ ނުވަތަ ފޯނު ކޯލެއް މެދުވެރިކޮށް އާންމުންނަށް ނުގުޅާނެކަމުގެ ޔަޤީންކަން އެ ކުންފުނިން ވަނީ އަރުވައިފައެވެ.
ރާއްޖޭގައި އޮޅުވާލައިގެން މީހުންގެ އަތުން ފައިސާ ހޯދުން އާންމުވެފައިވާއިރު، ގޮތް ނޭނގޭ ލިންކުތަކަށް ނުވަނުމަށާއި، ޒާތީ މަޢުލޫމާތާއި ބޭންކް އެކައުންޓާ ގުޅޭ އެއްވެސް މަޢުލޫމާތެއް އެއްވެސް ފަރާތަކާ ހިއްސާ ނުކުރުމަށް ކަމާބެހޭ އިދާރާތަކުން ދަނީ ތަކުރާރުކޮށް އިލްތިމާސްކުރަމުންނެވެ.
