ސްޕެއިންގެ ބާސެލޯނާގެ ބޭރު ސަރަހައްދެއްގައި، ރޭލު ދަގަނޑުމައްޗަށް ފާރެއް ވެއްޓިފައި އޮއްވައި އޭގެ މައްޗަށް ރޭލެއް އެރުމުގެ ސަބަބުން ހިނގި ނުރައްކާތެރި އެކްސިޑެންޓެއްގައި އެކަކު މަރުވެ، ގިނަ ބަޔަކަށް އަނިޔާވެއްޖެއެވެ.
ސްޕެއިންގެ އިރުއުތުރު ކެޓަލޯނިއާ ސަރަހައްދުގެ ގެލީޑާގައި އަންގާރަ ދުވަހު މި ހާދިސާ ހިނގާފައިވަނީ، އެ ގައުމުގެ ދެކުނު އަންދަލޫސިއާ ސަރަހައްދުގައި ހިނގި އެހެން ރޭލު އެކްސިޑެންޓެއްގައި 42 މީހުން މަރުވިތާ އެންމެ ދެ ދުވަސް ފަހުންނެވެ.
ކެޓަލޯނިއާ ސަރަހައްދުގެ ފަޔަރ ސަރވިސް އިންސްޕެކްޓަރު ކްލޯޑީ ގަލާޑޯ، ހާދިސާ ހިނގި ސަރަހައްދުގައި ހުރެ މީޑިއާއަށް މައުލޫމާތު ދެމުން ބުނެފައިވަނީ، މި ހާދިސާގައި 37 މީހަކަށް އެކިވަރުގެ އަނިޔާތައް ލިބިފައިވާ ކަމަށެވެ. މީގެ ތެރެއިން ހަތަރު މީހެއްގެ ހާލު ސީރިއަސް ކަމަށާއި، މި ހާދިސާގައި މަރުވީ ރޭލު ދުއްވަން ހުރި ޑްރައިވަރު ކަމަށް އޭނާ ބުންޏެވެ. އަދި ރޭލުގައި ތިބި ހުރިހާ ފަސިންޖަރުން މިހާރު ރައްކާތެރިކަމާއެކު އެ ސަރަހައްދުން ބާލާފައިވާ ކަމަށްވެސް އޭނާ ބުންޏެވެ.
ކެޓަލޯނިއާގެ ސިވިލް ޕްރޮޓެކްޝަން އެޖެންސީން ސޯޝަލް މީޑިއާގައި ހާމަކުރި ގޮތުގައި، މި އެކްސިޑެންޓް ހިނގަން މެދުވެރިވީ ރޭލު ދަގަނޑު ކައިރީގައި ހުރި ފާރެއް ދަގަނޑު މައްޗަށް ވެއްޓުމާ ގުޅިގެންނެވެ. ސްޕެއިންގެ ރޭލު އޮޕަރޭޓަރު 'އޭޑީއައިއެފް' އިން ބުނި ގޮތުގައި، މި ފާރު ވެއްޓެން މެދުވެރިވީ މި ހަފްތާގައި އެ ސަރަހައްދަށް ކުރި ބޯ ވިއްސާރައިގެ ސަބަބުން ކަމަށް ބެލެވެއެވެ.