ބަންޑުން ޖަހާލި މުދާ އުފުލާ ދޯނިން ގެއްލުނު ދެ މީހުންގެ ތެރެއިން ދިވެހި މީހާ ނިޔާވެފައި އޮއްވާ ފެނިއްޖެ ކަމަށް ފުލުހުން ބުނެފިއެވެ.
ފުލުހުން ބުނީ ހަތަރު މީހުންނާއެކު ދަތުރު ކުރަމުންދިޔަ "ބަލްމާ 6" ނަމަކަށް ކިޔާ މުދާ އުފުލާ ދޯންޏެއް، ކ. ވާދޫ ކައިރިން ބަންޑުން ޖަހާލާފައިވާކަމުގެ މަޢުލޫމާތު ލިބިފައިވަނީ މިއަދު 07:27 ހާއިރު ކަމަށެވެ.
އަދި މި ދޯނިން ދަތުރުކުރި ހަތަރު މީހުންގެ ތެރެއިން ދެ މީހަކު އެ ސަރަހައްދުން ދަތުރުކުރި ދޯންޏަކަށް ނަގާފައިވާ ކަމަށާއި، އަނެއް ދެ މީހުންގެ ތެރެއިން އެކަކު ނިޔާވެފައިވާ އޮއްވާ ފެނިފައިވާ ކަމަށް ފުލުހުން ބުންޏެވެ. މިގޮތުން ގެއްލިފައިވަނީ ދިވެއްސަކާއި ބިދޭސީއެއް ކަމަށްވާއިރު، ދެ މީހުންގެ ތެރެއިން ނިޔާވެފައި އޮއްވާ ފެނުނީ ދިވެހި މީހާ ކަމަށް ފުލުހުން ބުންޏެވެ.
ފުލުހުން ބުނީ ދޯނި ބަންޑުން ޖަހާލި ސަރަހައްދުގައި، ގެއްލުނު މީހުން ހޯދުމަށް ފުލުހުން މަސައްކަތް ކުރަމުންދާ ކަމަށެވެ.