ނޭޓޯގެ މެންބަރު ޤައުމުތަކުގެ ސަރަޙައްދުތަކާއި، ޚާއްޞަކޮށް ޑެންމާކުގެ ބާރުގެ ދަށުގައި އޮންނަ އަމިއްލަ އިދާރީ ހިންގުން އޮންނަ ގްރީންލޭންޑް، އެމެރިކާގެ ބާރުގެ ދަށަށް ގެނައުމަށް ރައީސް ޑޮނަލްޑް ޓްރަމްޕް ކުރައްވަމުން ގެންދަވާ މަސައްކަތްޕުޅުތައް ހުއްޓުވުމަށް އެމެރިކާގެ ސެނެޓަށް ބިލެއް ހުށަހަޅައިފިއެވެ.
"ނޭޓޯ ޔުނިޓީ ޕްރޮޓެކްޝަން އެކްޓް" ގެ ނަމުގައި އަންގާރަ ދުވަހު ހުށަހެޅި މި ބިލަކީ އެމެރިކާގެ ސިޔާސީ ދެ ޕާޓީގެ މެންބަރުން ގުޅިގެން ހުށަހެޅުއްވި ބިލެކެވެ. މި ބިލުގެ ދަށުން، ނޭޓޯގެ އެއްވެސް މެންބަރު ޤައުމެއްގެ ސަރަޙައްދެއް ބަންދުކުރުމަށް، ނުވަތަ ހިފުމަށް، ނުވަތަ އެމެރިކާގެ ބާރުގެ ދަށަށް ގެނައުމަށް އެމެރިކާގެ ޑިފެންސް ޑިޕާޓްމަންޓާއި ސްޓޭޓް ޑިޕާޓްމަންޓުގެ ބަޖެޓުން އެއްވެސް ޚަރަދެއް ކުރުން މަނާކުރެއެވެ.
ޑިމޮކްރެޓިކް ޕާޓީގެ ސެނެޓަރު ޖީން ޝަހީން އާއި ރިޕަބްލިކަން ޕާޓީގެ ސެނެޓަރު ލީސާ މަރްކޯސްކީ އިސްވެ ތިއްބަވައި ތައްޔާރުކުރެއްވި މި ބިލު ހުށަހަޅާފައިވަނީ، ގްރީންލޭންޑަކީ އެމެރިކާގެ ބާރުގެ ދަށަށް ގެންނަންޖެހޭ ތަނެއް ކަމަށާއި، ބޭނުންވެއްޖެ ނަމަ ބާރުގެ ބޭނުންކޮށްގެންވެސް އެކަން ކުރަންޖެހޭނެ ކަމަށް ޓްރަމްޕް ތަކުރާރުކޮށް ވިދާޅުވަމުން ގެންދަވާތީ އެކަމުގެ ކަންބޮޑުވުންތައް އިތުރުވެފައިވާ ދަނޑިވަޅެއްގައެވެ.
ސެނެޓަރު ޝަހީން ނެރުއްވި ބަޔާނެއްގައި ވިދާޅުވީ، ނޭޓޯގެ އިއްތިހާދު ރޫޅާލައި، އެ އިއްތިހާދަށް އެމެރިކާއިން ވެފައިވާ ވަޢުދުތަކާ ޚިލާފުވާ ފަދަ ކަންކަމަށް އެމެރިކާގެ ރައްޔިތުންގެ ޓެކްސް ފައިސާ ބޭނުން ނުކުރެވޭނެކަން މި ބިލުން ސާފުކޮށްދޭ ކަމަށެވެ. އަދި ގްރީންލޭންޑާ ގުޅޭގޮތުން ދާދިފަހުން ދައްކަވާފައިވާ ވާހަކަތަކަކީ އެމެރިކާގެ ޤައުމީ ސަލާމަތަށް އޮތް ނުރައްކަލެއް ކަމަށާއި، ކޮންގްރެސްގެ ދެ ޕާޓީންވެސް މިކަމާ ދެކޮޅުކަން މި ބިލުން ހާމަވާ ކަމަށް އޭނާ ވިދާޅުވިއެވެ.
ރިޕަބްލިކަން ޕާޓީގެ ސެނެޓަރު މަރްކޯސްކީ ވިދާޅުވީ، ދުނިޔޭގެ ސުލްހަ މަސަލަސްކަން ދެމެހެއްޓުމަށް އޮތް އެންމެ ވަރުގަދަ އައްޑަނައަކީ 32 ޤައުމުގެ މައްޗަށް އެކުލެވޭ ނޭޓޯ އިއްތިހާދު ކަމަށެވެ. އަދި އެމެރިކާގެ ވަޞީލަތްތައް ބޭނުންކޮށްގެން އެކުވެރި ދައުލަތްތަކާ ދެކޮޅަށް ފިޔަވަޅު އެޅުމުގެ ވިސްނުމަކީ ބަލައިގަނެވޭނެ ކަމެއް ނޫން ކަމަށާއި، ޤާނޫނަކުން އެކަން މަނާކުރަންޖެހޭ ކަމަށްވެސް އޭނާ ވިދާޅުވިއެވެ.
ގްރީންލޭންޑް ހިފުމަށް ޓްރަމްޕް ދެއްވަމުން ގެންދަވާ އިންޒާރުތަކުގެ ސަބަބުން އެމެރިކާގެ އެކުވެރި ވިލާތުގެ ޤައުމުތަކުން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ. އަދި މިއީ ނޭޓޯގެ ނިމުން ކަމަށް ބުނެ ބައެއް ފަރާތްތަކުން ވަނީ އިންޒާރު ދީފައެވެ. ނޭޓޯ ބިނާވެފައިވަނީ އެއް ޤައުމަށް ދޭ ހަމަލާއަކީ ހުރިހާ ޤައުމަކަށް ދޭ ހަމަލާއެއްގެ ގޮތުގައި ބަލާ އުޞޫލުގެ މައްޗަށެވެ.
ޓްރަމްޕް ވިދާޅުވަނީ އާކްޓިކް ސަރަޙައްދުގެ މި ބޮޑު ބިން އެމެރިކާގެ ބާރުގެ ދަށަށް ގެނައުމަކީ ޤައުމީ ސަލާމަތަށް މުހިންމު ކަމެއް ކަމަށެވެ. އަދި ދެވަނަ ބޮޑު ހަނގުރާމައަށްފަހު ހުޅަނގުގެ ސަލާމަތީ ނިޒާމުގެ ބިންގާ ކަމަށްވާ ނޭޓޯ އިއްތިހާދަށް މިކަމުގެ ސަބަބުން ކުރިމަތިވެދާނެ ލޮޅުންތަކަށް އޭނާ އެއްވެސް ސަމާލުކަމެއް ނުދެއްވައެވެ. މީގެ އިތުރުން ޓްރަމްޕް ވިދާޅުވާ ގޮތުގައި، އެމެރިކާއިން ގްރީންލޭންޑްގެ ކޮންޓްރޯލް ނުނަގައިފިނަމަ، ގުދުރަތީ ވަޞީލަތްތަކާއި މައުދަނުން މުއްސަނދިވެފައިވާ އެ ބިން ޗައިނާ ނުވަތަ ރަޝިޔާގެ ބާރުގެ ދަށަށް ހިނގައިދާނެއެވެ.
ނަމަވެސް، ގްރީންލޭންޑްގެ 57،000 ރައްޔިތުންގެ ތެރެއިން ގިނަ ބަޔަކު ތިބީ އެމެރިކާގެ ދަށަށް ދިއުމާ ދެކޮޅަށެވެ. މިދިޔަ އަހަރު ޑެންމާކުގެ ނޫހަކުން ކުރި ސާވޭއަކުން ދައްކާ ގޮތުގައި، އެ ޤައުމުގެ 85 އިންސައްތަ ރައްޔިތުން އެމެރިކާއާ ގުޅެން ބޭނުން ނުވާ އިރު، އެކަމަށް ތާއީދު ކުރަނީ އެންމެ 6 އިންސައްތަ މީހުންނެވެ.