ދައުލަތުގެ ބަޖެޓުން އަމިއްލަ މީދިއާތަކަށް ދޭ މާލީ އެހީތެރިކަން 40 މީޑީއާއަކަށް ދިނުމަށް ފޮނުވާފައިވާ ކަމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ބުނެފިއެވެ.
މީޑިއާ ކޮމިޝަނުން މިއަދު ބުނީ އަމިއްލަ މީޑިއާތަކަށް 2025 ވަނަ އަހަރު ދޭ މާލީ އެހީތެރިކަމަށް 41 މީޑިއާއަކުން ޝަރުތު ހަމަވެ، އެ މީޑިއާތަކުގެ މަޢުލޫމާތު އަދި ލިބޭ ފައިސާގެ އަދަދު ޔޫތު މިނިސްޓްރީއަށް މިދިޔަ ޑިސެންބަރު މަހުގެ 30 ވަނަ ދުވަހު ފޮނުވި ނަމަވެސް، ޝަރުތު ހަމަވެފައިވާ 41 އެޕްލިކޭޝަންގެ ތެރެއިން ދެ އެޕްލިކޭޝަނަކީ އެއް ކުންފުންޏަކުން ހިންގާ ދެ މީޑިއަމްކަން ފާހަގަވުމާ ގުޅިގެން، އެކަމާ ގުޅޭގޮތުން އެ މީޑިއާއާ ބައްދަލުކޮށް، ކަން ހިނގާފައިވާ ގޮތް އޮޅުން ފިލުވައި، މިކަމުގެ މަޢުލޫމާތު ހިއްސާކޮށްފައިވާ ކަމަށެވެ.
މީޑިއާ ކޮމިޝަނުން ބުނީ މިކަން ހައްލުކޮށް ނިމެންދެން އެ ޕޭމަންޓް ހޯލްޑްކޮށްފައި ބެހެއްޓުމަށް ޔޫތު މިނިސްޓްރީ އަށް އަންގާފައިވާ ކަމަށާއި، ނަމަވެސް ބާކީ 39 މީޑިއާއަށް ލިބޭ ފައިސާ ދިނުމުގެ ކަންކަން ޔޫތު މިނިސްޓްރީއާއި ފިނޭންސް މިނިސްޓްރީ ގުޅިގެން ކުރިއަށް ގެންދިއުމުގެ މަސައްކަތް ކުރިއަށްދާ ކަމަށެވެ.
އެހެންކަމުން، މިހާރު މީޑިއާތަކަށް ދައުލަތުން ދޭ އެހީތެރިކަން ލިބިގެންދާނީ 40 އެޕްލިކޭޝަނަކަށް ކަމަށާއި، އެހީއަށް ހުށަހެޅި މީޑިއާ އެޕްގެ ތެރެއިން މި ގެނެވުނު ބަދަލުތައް ފެންނާނެ ގޮތަށް ހަމަޖެއްސުމުގެ މަސައްކަތް ކުރަމުންދާ ކަމަށްވެސް މީޑިއާ ކޮމިޝަނުން ބުނެފައިވެއެވެ.