ޕްރައިމަރީ ތަޢުލީމު ވަރުގަދަކޮށް، ދަރިވަރުންގެ މެދުގައި ދިވެހި ބަހުން ލިޔެކިޔުން ކުރިއެރުވުމުގެ މަގުސަދުގައި ބޮއިންގް ކުންފުންޏާއި ރޫމް ޓު ރީޑް ގުޅިގެން ރާއްޖޭގައި “އަރލީ ލާނިންގ” ޕްރޮގްރާމެއް ފަށައިފިއެވެ.
ތަޢުލީމީ ވުޒާރާއިން ބުނީ މި ޕްރޮގްރާމްގެ ދަށުން ބޮއިންގްގެ މާލީ އެހީތެރިކަމާއެކު، ރޫމް ޓު ރީޑް އާއި ނޭޝަނަނަލް އިންސްޓިޓިއުޓް އޮފް އެޑިޔުކޭޝަން (އެން.އައި.އީ) އަދި އެ ވުޒާރާ ގުޅިގެން، 15 ކުޑަކުދިންގެ ފޮތް ދިވެހި ބަހަށް ތަރުޖަމާކުރުމުގެ މަސައްކަތް ކުރިއަށްދާނެ ކަމަށާއި، މި ފޮތްތައް ޑިޖިޓަލްކޮށާއި، ޕްރިންޓްކޮށް، ސަރުކާރުގެ ހުރިހާ ސްކޫލްތަކަށް ފޮނުވުމަށް ހަމަޖެހިފައިވާ ކަމަށެވެ.
މި ޕްރޮގްރާމް އިފުތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ، ފޮތް ކިޔުމުގެ ވަރުގަދަ ސަގާފަތެއް އުފެއްދުމަކީ ޤައުމީ ތަޢުލީމީ އިސްތިރާޖުގެ މުހިންމު ބައެއް ކަމަށާއި، ދިވެހި ބަހަށް ތަރުޖަމާކޮށްފައިވާ މި ފޮތްތަކުގެ ސަބަބުން، މަތީ ފެންވަރުގެ އަދަބިއްޔާތާއި ފޮތްކިޔުމުގެ ރަނގަޅު ތަޖުރިބާއެއް ދަރިވަރުންނާ ހަމައަށް ގެނެސްދޭނެ ކަމަށެވެ.
އަދި މީގެ ސަބަބުން ޕްރައިމަރީ ތަޢުލީމު ވަރުގަދަވެ، ދިވެހިރާއްޖޭގެ ސްކޫލުތަކުގެ ތަޢުލީމީ ފެންވަރު ރަނގަޅުކުރުމަށް މިނިސްޓްރީއިން ކުރަމުންދާ މަސައްކަތަށް ބޮޑު ކުރިއެރުމެއް ލިބިގެންދާނެ ކަމަށްވެސް ވަޒީރު ވިދާޅުވިއެވެ.
ރޫމް ޓު ރީޑް އަކީ ބޮއިންގް ކުންފުނީގެ ބޮއިންގް ގްލޯބަލް އެންގޭޖްމެންޓް (ބީ.ޖީ.އީ) އާ ގުޅިގެން ހިންގާ ގްލޯބަލް އެޑިޔުކޭޝަން ނޮން-ޕްރޮފިޓް ޖަމްޢިއްޔާއެކެވެ. މި ޕާޓްނަޝިޕްގެ ދަށުން އެކި ޤައުމުތަކުގެ ސްކޫލުތަކުގައި އަރލީ ގްރޭޑް ލަރނިންގގެ ލިޔެކިޔުން ކުރިއެރުމަށް ގިނަ މަސައްކަތްތަކެއް ވަނީ ކޮށްފައެވެ. އޭގެ ތެރޭގައި އެކި ޤައުމުތަކުގެ ބަހުރުވައިން ފޮތް ތައްޔާރުކުރުމާއި، ލައިބްރަރީތައް ތަރައްޤީކުރުމުގެ އިތުރުން ކުޑަކުދިންނަށް ޚާއްޞަ ލިޓްރެސީ ޕްރޮގްރާމްތައް ހިންގުމަށް އެހީތެރިކަން ފޯރުކޮށްދިނުން ހިމެނެއެވެ.