ދުންފަތާއި ދުރު ޖީލެއް ބިނާކުރުމަކީ ދިވެހިރާއްޖޭގެ ކުޅިވަރުގެ ކުރިމަގަށް ގިނަ ފައިދާތަކެއް ކުރާނެ ކަމެއް ކަމަށް ކުޅިވަރާއި ހަށިހެޔޮކަމާއި ވަޒީރު އަބްދުالله ރާފިޢު ވިދާޅުވެއްޖެއެވެ.
ޓެލެތޯންގައި ވާހަކަދައްކަވަމުން ކުޅިވަރާއި ހަށިހެޔޮކަމާބެހޭ ވަޒީރު ޢަބްދުﷲ ރާފިޢު ވިދާޅުވީ ދުންފަތާ ދުރު ޖީލެއް ބިނާކުރުމާއެކު، ކުޅިވަރުގެ ދާއިރާއިން ކުރިމަގުގައި އިތުރު ކުރިއެރުންތައް ލިބިގެންދާނެ ކަމަށެވެ.
"ކުދިންގެ ޕާފޯމަންސް އިމްޕްރޫވްވެގެންދާނެ، މިހާރުވެސް ވޭޕް މަނާކުރުމާއެކު އޭގެ އަސަރުތައް އެތުލީޓުންގެ ފަރާތުން ދަނީ ފެންނަމުން، އެކަން ހުރިހާ ފަރާތަކުންވެސް ފާހަގަކުރޭ،" ވަޒީރު ރާފިޢު ވިދާޅުވިއެވެ.
"ނޭޝަނަލް ޓޯޗް ރަން" ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ކުޅިވަރު ވަޒީރު ވިދާޅުވީ ދިވެހިރާއްޖޭގެ ކުރިއަރަމުން އަންނަ ޒުވާން އެތުލީޓުންނާއި ކުރިމަގުގައި ގައުމީ ޓީމުގެ އެތުލީޓުންނަށް ދުންފަތުގެ އިސްތިއުމާލުކުރުމާއި ދުރަށް ދިއުމަށް އެހީތެރިވެގެންދާނެ ކަމަށެވެ.
ދުންފަތުގެ އިސްތިއުމާލު ނުކުރުމަކީ އެތުލީޓުންނަށް ގިނަ ފައިދާތަކެއް ކުރާނެ ކަމެއް ކަމަށާއި މިކަމުގެ ސަބަބުން ނޭވާލުމުގެ ނިޒާމު ވަރުގަދަވެ ބުންވަރު އިތުރުވުމަށް އެހީވެދޭކަމަށްވެސް ވަޒީރު ފާހަގަކުރެއްވިއެވެ.
ސަރުކާރުގެ ފަރާތުން ދުންފަތް ކޮންޓްރޯލް ކުރުމާބެހޭ ޤާނޫނަށް ހުށަހަޅުއްވާފައިވާ އިސްލާހުގައި ބަޔާންކޮށްފައިވާ ގޮތުގައި މި ބިލު ޤާނޫނަކަށްވުމުން 1 ޖެނުއަރީ 2007އިން ފެށިގެން އުފަންވެފައިވާ އެއްވެސް މީހަކު ދުންފަތުގެ އިސްތިއުމާލުކޮށްގެން ނުވާނެއެވެ. އަދި އެއުމުރުގެ އެއްވެސް މީހަކަށް ދުންފަތުގެ ބާވަތެއް ވިއްކުމަކީވެސް މަނާކަމެކެވެ.
