ރާއްޖޭގެ ހަތަރު އަތޮޅެއްގެ ރައްޔިތުންގާތަށް ކުރެއްވި ދަތުރުފުޅުގެ މަޤްޞަދު ޙާސިލުވެއްޖެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރާއްޖޭގެ މީހުން ދިރިއުޅޭ ހަތަރު އަތޮޅަށް ކުރެއްވި ދަތުރުފުޅުގައި އެންމެ ފަހުރަށްކަމަށްވާ ތިމަރަފުށީ ރައްޔިތުންނާ މިރޭ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާގެ މި ދަތުރުފުޅުގައި، ފެލިދެއަތޮޅާއި، މުލަކަތޮޅާއި، ނިލަންދެއަތޮޅު އުތުރުބުރިއާއި ކޮޅުމަޑުލުގެ މީހުން ދިރިއުޅޭ 31 ރަށަށް ވަނީ ޒިޔާރަތްކުރައްވާފައެވެ.
ރައީސުލްޖުމްހޫރިއްޔާ ވިދާޅުވީ، ހުރިހާ ރަށެއްގެ ރައްޔިތުންވެސް އެމަނިކުފާނަށް ވަރަށް ހޫނު މަރުޙަބާއެއް ވިދާޅުވެ، މެހުމާންދާރީ އަދާކުރައްވައި އަދި އެމަނިކުފާނާއި އެމަނިކުފާނުގެ ޓީމަށް، ރައްޔިތުން ބޭނުންވާކަންކަން ވަރަށް ރަނގަޅަށް ހިއްސާކުރެއްވިކަމަށެވެ. މިކަމުގެ ސަބަބުން އެމަނިކުފާނު ރައްޔިތުން ގާތަށް ކުރެއްވި މި ޒިޔާރަތުގެ މަޤްޞަދު ޙާސިލުވެގެންދިޔަ ކަމަށް ވިދާޅުވިއެވެ.
މިހަތަރު އަތޮޅަށް ކުރެއްވި ދަތުރުފުޅުގައި ޖުމުލަ 40 އެއްބަސްވުމެއްގައި ސޮއިކުރައްވައި، 60 މަޝަރޫޢެއް ފައްޓަވައި، 24 މަޝްރޫޢެއް ނިމިގެން ދިޔަކަމުގައި އެމަނިކުފާނު ވިދާޅުވިއެވެ. މީގެ އިތުރުން މި ހަތަރު އަތޮޅުގައި، ބޭންކް އޮފް މޯލްޑިވްސްގެ އޭޓީއެމް ނުހުޅުވި ހުރި ހުރިހާ ރަށެއްގައި އޭޓީއެމްގެ ޚިދުމަތް ޤާއިމުކޮށް، މިހާރު ވ، މ،ފ އަދި ތ އަތޮޅުގެ ހުރިހާ ރަށެއްގައި އޭޓީއެމްގެ ޚިދުމަތް ފެށިފައިވާކަންވެސް އެމަނިކުފާނު ފާހަގަކުރެއްވިއެވެ.
މި ހުރިހާ މަޝްރޫޢުގެ ތެރެއިން އެންމެ ގިނަ މަޝްރޫޢު ކުރިއަށް ގެންދެވުނީ ތ. އަތޮޅުގައިކަން ފާހަގަކުރައްވައި އެމަނިކުފާނު ވިދާޅުވީ ޒަމާންތަކެއްވަންދެން ތަރައްޤީގެ ރާޑަރުން ކައްސާލާފައި އޮތް ކޮޅުމަޑުލު، ތަރައްޤީގެ ރާޑަރުގެ ސީދާ މެދަށް ގެނެވިފައިވާކަމަށެވެ.
