އޭޝިއާ ޕެސިފިކްގެ ވަޒީރުންނާއި ތިމާވެށީގެ އޮތޯރިޓީތަކުގެ ހަވަނަ ފޯރަމްގެ ބޭރުގައި، ފަތުރުވެރިކަމާއި ތިމާވެށްޓާ ބެހޭ ވަޒީރު ޠާރިޤް އިބްރާހިމް، އެކުވެރި ދައުލަތްތަކުގެ ތިމާވެށީގެ ޕްރޮގްރާމް (ޔޫ.އެން.އީ.ޕީ) ގެ ނައިބު އެގްޒެކެޓިވް ޑިރެކްޓަރ، މިސް.އެލިޒަބަތް މަރުމާ މްރޭމާ އާ ބައްދަލުކުރައްވައި، ޔޫ.އެން.އީ.ޕީ.އާ އެކު ކުރިއަށްދާ ގުޅުން ބަދަހިކުރުމާއި، ގްލޯބަލް ކޮމިޓްމަންޓްތައް ހާސިލްކުރުމަށް އެއްބާރުލުން ދިނުމާބެހޭގޮތުން މަޝްވަރާ ކުރައްވައިފިއެވެ.
މި ބައްދަލުވުމުގައި ދެފަރާތުން ވަނީ، ތިމާވެށި ރައްކާތެރިކުރުމާއި، ދެމެހެއްޓެނިވި ތަރައްޤީއަށްޓަކައި ޔޫ.އެން.އީ.ޕީ.އާ އެކު ރާއްޖެއިން ކުރިއަށްގެންދާ މަސައްކަތްތަކާއި، ކުރިއަށް އޮތްތަނުގައި އެއްބާރުލުން ދެވިދާނެ ދާއިރާތަކާބެހޭގޮތުން ފުޅާ ދާއިރާއެއްގައި ވާހަކަ ދައްކަވާފައެވެ. ޚާއްސަކޮށް، މޫސުމަށް އަންނަ ބަދަލުތަކާ ގުޅިގެން ރާއްޖެއަށް ކުރިމަތިވާ ގޮންޖެހުންތަކާއި، މި ގޮންޖެހުންތައް ހައްލުކުރުމަށް ބޭނުންވާ ބައިނަލްއަޤްވާމީ އެހީތެރިކަމާ ބެހޭގޮތުން މިނިސްޓަރ ވަނީ މައުލޫމާތު ދެއްވާފައެވެ.
މީގެ އިތުރުން، ދުނިޔެއަށް ކުރިމަތިވެފައިވާ ތިމާވެށީގެ މައްސަލަތައް ހައްލުކުރުމަށް ބައިނަލްއަޤްވާމީ ފެންވަރުގައި ހަދާފައިވާ އެއްބަސްވުންތަކާއި، ވައުދުތައް ފުއްދުމަށްޓަކައި ދެ ފަރާތުން ގުޅިގެން މަސައްކަތް ކުރުމުގެ މުހިންމުކަންވެސް މި ބައްދަލުވުމުގައި ފާހަގަކުރެވުނެވެ.
މި ބައްދަލުވުމަކީ، ދިވެހިރާއްޖެއާއި ޔޫ.އެން.އީ.ޕީ.އާ ދެމެދުގައިވާ ގުޅުން އިތުރަށް ހަރުދަނާކޮށް، ތިމާވެށީގެ ދާއިރާއިން ކުރިއަށް އޮތްތަނުގައިވެސް އެއްބާރުލުން އިތުރުކުރުމަށްޓަކައި މުހިންމު ފިޔަވަޅެކެވެ.
މި ލިޔުން ކިޔާލުމުން
