ދިވެހި ދައުލަތް ހިންގުމުގެ ދާއިރާއިން ރައްޔިތުންގެ ބާރު ކަށަވަރުކޮށް، ޖަވާބުދާރީ ކުރުވަނިވި ނިޒާމެއް ގާއިމްކުރުމަށްޓަކައި "އެދޭ ރާއްޖެ" ނަމުގައި އިސްލާހީ ހަރަކާތެއް އިފްތިތާހުކޮށްފިއެވެ. މި ހަރަކާތް އިފްތިތާހުކޮށްފައިވަނީ، ރައްޔިތުންގެ މަސްލަހަތު އެންމެ އިސްކުރާ، ހާމަކަމާއި ޖަވާބުދާރީ ކުރުވަނިވި ހިންގުމުގެ ނިޒާމެއް ގާއިމްކުރުމަށް ގާނޫނުއަސާސީއަށް ބަދަލުތައް ގެނައުމުގެ މަޤްސަދުގައެވެ.
މި ހަރަކާތް އިފްތިތާހު ކުރުމާ ގުޅިގެން ނެރެފައިވާ ބަޔާނެއްގައި ފާހަގަކޮށްފައިވަނީ، ގައުމުގެ ހަގީގަތަކީ ދިވެހި ދައުލަތުގެ ހިންގުމުގެ ނިޒާމުގެ ތަރުތީބު ވާންޖެހޭނީ ރައްޔިތުންގެ މަސްލަހަތަކީ އެންމެ އިސް މަސްލަހަތު ކަމަށް ދެކިގެން ކަމަށެވެ. ނަމަވެސް، 2008 ވަނަ އަހަރު ފާސްކުރި ފަހި ގާނޫނުއަސާސީއިން ތަސައްވުރުކުރި ތިން ބާރުގެ، ހާމަކަމާއި ޖަވާބުދާރީ ކުރުވަނިވި ހިންގުމުގެ ނިޒާމެއް ދިވެހި ރައްޔިތުންނަށް ނުލިބޭކަން މި ބަޔާނުގައި ބަޔާންކޮށްފައިވެއެވެ. އެހެންކަމުން، ރައްޔިތުން އެދުނު ރާއްޖެ ހޯދުމަށް ގާނޫނުއަސާސީ އިސްލާހު ކުރުމުގެ ބޭނުމުގައި މި ހަރަކާތް އިފްތިތާހުކޮށްފައިވަނީ، ވެރިންނަކީ ރައްޔިތުން ކަމަށްވުމުން އެ ބާރު އަބަދުވެސް ރައްޔިތުންގެ އަތްމަތީގައި ދެމި އޮންނަކަން ކަށަވަރުކުރުމުގެ ބޭނުމުގައެވެ.
"އެދޭ ރާއްޖެ" ހަރަކާތުން ވަނީ މި ހަރަކާތުގެ ތެރެއިން ފުޅާ ދާއިރާއެއްގައި ބަހުސްކޮށް ގާނޫނުއަސާސީއަށް އެކި ބަދަލުތައް ހިމެނުމަށް ހުށަހަޅާނެ ކަމަށް ބުނެފައެވެ. އެގޮތުން ހިމެނޭ މުހިންމު ކަންކަމުގެ ތެރޭގައި:
- ރައްޔިތުންގެ ބާރު އިތުރަށް ގާނޫނުއަސާސީގައި ލިޔުން.
- ރައްޔިތުންގެ މަޖިލިސް ތަރުތީބު ކުރުން.
- ގައުމީ ތަރައްގީގެ ތަސައްވުރެއް ގާނޫނުއަސާސީގައި ލިޔުން.
- އަތޮޅު ހިންގުމަށް މިހާރަށްވުރެ އިތުރަށް ބާރުތައް ދިނުން.
މީގެ އިތުރުން، އަދުލު އިންސާފުގެ ދާއިރާ އިތުރަށް މިނިވަން ކުރެވޭނެ ގޮތެއް ގާނޫނުއަސާސީގެ ތެރެއިން ހޯދުމާއި، އިންތިހާބީ ނިޒާމު މިހާރަށްވުރެ ވަރުގަދަ ކުރުމާއި، އަތޮޅު ހިންގުމުގައި ރައްޔިތުންގެ ޝާމިލުވުން އިތުރުކުރުމާއި، ދައުލަތް ޖަވާބުދާރީ ކުރުމުގެ ނިޒާމް އަލުން ތަރުތީބު ކުރުމަށް ވެސް "އެދޭ ރާއްޖެ" ހަރަކާތުން ގޮވާލައެވެ.
އަދި މިނިވަން ބަންޑާރަ ނައިބެއް ހޯދުމާއި، ސިޔާސީ ޕާޓީތަކުގެ ހިންގުން މިހާރަށްވުރެ ހަރުދަނާ ކުރުމާއި، ދައުރު މެދުތެރެއިން މިޑްޓާމް އިންތިހާބެއް ބޭއްވުމުގެ އިންތިޒާމެއް ހަމަޖެއްސުމާއި، ދައުލަތާއި ސަރުކާރުގެ އިންފާރު ވަކިކުރުމާއި، ގާނޫނުއަސާސީއާ ހިލާފުވާ ދައުލަތުގެ އިސް ހިންގުންތެރިންނަށް ހާއްސަ އަދަބެއް ކަނޑައެޅުމާއި، ސަރުކާރަށް ސިޔާސީ މަގާމު ހޯދުމުގައި ވަކި ކޯޓާއެއް ހަމަޖެއްސުމަށް ވެސް މި ހަރަކާތުން ގޮވާލާފައިވެއެވެ. ސަރުކާރާއި މުޅިން ވަކިން މިނިވަންކަމާއެކު ދައުލަތުގެ އެސެޓްތައް ހާމަކޮށް ބަލަހައްޓާނެ ނިޒާމެއް އެކުލަވާލުމާއި، ހިންގުން ހަރުދަނާވާނެ އޮނިގަނޑެއް ގާނޫނުއަސާސީއިން ބާރު ލިބިގެން އުފެއްދުމަށް ވެސް "އެދޭ ރާއްޖެ" ހަރަކާތުން ހުށަހަޅާފައިވެއެވެ.
މި ހަރަކާތުން ގޮވާލާފައިވަނީ، މި ކަންކަމަކީ އިލްމީ އަދި ފަންނީ ގައުމީ ބަހުސްތަކުން ހައްލު ހޯދޭނެ ކަންކަމަށްވާތީ، ދިވެހި އެންމެހާ ރައްޔިތުންނަށާއި، ސަރުކާރަށާއި، ސިޔާސީ ޕާޓީތަކަށާއި، ލޯކަލް ކައުންސިލްތަކަށާއި، މީޑިއާއަށާއި، މަދަނީ ޖަމްއިއްޔާތައް ހިމެނޭހެން ރާއްޖޭގެ ހުރިހާ ޒުވާނުންނަށެވެ. އަދި އެ ފަރާތްތަކުގެ ބައިވެރިވުން ހިމަނައިގެން، ރައްޔިތުންގެ ޝާމިލުވުން އޮވެގެން ގާނޫނުއަސާސީއަށް ގެންނަން ޖެހޭ ބަދަލުތައް ގެނައުމަށް "އެދޭ ރާއްޖެ" ހަރަކާތުން މަސައްކަތް ކުރާނެ ކަމަށް ވަނީ ބުނެފައެވެ.
