ރާއްޖޭގެ ޚާއްޞަ އިޤްތިސާދީ ސަރަހައްދު ގެ ތެރޭގައި ޤާނޫނާއި ޚިލާފަށް ހަރަކާތްތެރެވި ކަމަށް ތުހުމަތުކުރެވޭ ޝްރީލަންކާއަށް ނިސްބަތްވާ ދެ މަސްބޯޓެއް، އެމް.އެން.ޑީ.އެފް ކޯސްޓްގާޑް ހުރަވީގެ ބެލުމުގެ ދަށަށް ގެނެސްފިއެވެ.
މިކަން ހާމަކޮށްފައިވަނީ އެމް.އެން.ޑީ.އެފް އިންނެވެ.
މި ދެބޯޓް ކޯސްޓްގާޑުގެ ބެލުމުގެ ދަށަށް ގެނެސްފައިވަނީ ރާއްޖޭގެ ޚާއްޞަ އިޤްތިސާދީ ސަރަހައްދު ބެލެހެއްޓުމަށް އެމް.އެން.ޑީ.އެފް ކޯސްޓްގާޑުން ހިންގި އޮޕަރޭޝަނެއްގައި، މިމަހުގެ 22 ވަނަދުވަހުގެ ރޭގެ ވަގުތެއްގައެވެ.
ޤާނޫނާ ޚިލާފަށް ހަރަކާތްތެރެވި ކަމަށް ތުހުމަތުކުރެވޭ މި ދެ މަސްބޯޓާމެދު ޤާނޫނުގައިވާގޮތުގެމަތިން ޢަމަލުކުރުމަށްޓަކާ، ދިވެހި ފުލުހުންގެ ޚިދުމަތާ ހަވާލުކުރުމަށް މިހާރުދަނީ މާލެ ގެނައުމުގެ މަސައްކަތް ކުރަމުންނެވެ. ރާއްޖޭގެ ކަނޑުގެ ސަރަހައްދު ރައްކާތެރިކޮށް، ޤާނޫނުތައް ތަންފީޒުކުރުމަށް އެމް.އެން.ޑީ.އެފް ކޯސްޓްގާޑުން އަބަދުވެސް މަސައްކަތް ކުރަމުންދާނެ ކަމަށް ވަނީ ބުނެފައެވެ.
