ދިވެހި ފުލުހުންގެ ޚިދުމަތުގެ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް (އެންސީޕީއެލްއީ) އާއި މޯލްޑިވްސް ޒަކާތު ހައުސް ގުޅިގެން އިސްލާމިކް ސެންޓަރުގެ ކޮންވެންޝަން ހޯލުގައި ތާޒްޑޭ ފޯރަމްގެ ހަތަރުވަނަ ބައްދަލުވުން ބާއްވައިފިއެވެ. މި ފޯރަމްގައި 177 މުވައްޒަފުން ބައިވެރިވެފައިވާކަން ފާހަގަކުރެވެއެވެ.
ތާޒްޑޭ ފޯރަމަކީ ދިވެހި ފުލުހުންގެ ޚިދުމަތުގައި މަސައްކަތްކުރާ މުވައްޒަފުންނަކީ އިލްމީ ނަޒަރަކުން ކަންކަމާމެދު ވިސްނައި، ދިރާސާއާއި ތަޖުރިބާގެ އަލީގައި ނިންމުންތައް ނިންމާ ސަގާފަތެއް ގެންގުޅޭ ބަޔަކަށް ހެދުމުގެ މަޤްޞަދުގައި ބާއްވާ ފޯރަމެކެވެ. މި ފޯރަމް ފެށުނީ އެސިސްޓެންޓް ޑިރެކްޓަރ ރަނާ ވަޙީދު، ފޯރަމް ތަޢާރަފުކުރައްވައި ދެއްކެވި ވާހަކަފުޅުންނެވެ. އަދި މަރުޙަބާ ދެންނެވުމުގެ ގޮތުން ވާހަކަފުޅު ދެއްކެވީ ޒަކާތު ހައުސްގެ އެކްޓިންގ ޑެޕިއުޓީ ޑިރެކްޓަރ ޖެނެރަލް ޝައިޚް މޫސާ މުޢިއްޒު އެވެ.
މި ފޯރަމްގައި އިސްލާމްދީނުގެ ފަސް ރުކުނުގެ ތެރެއިން އެއް ރުކުން ކަމުގައިވާ ޒަކާތާ ބެހޭގޮތުން ފުލުހުންގެ ހޭލުންތެރިކަން އިތުރުކުރުމަށް މަޢުލޫމާތު ދެވުނެވެ. އެގޮތުން، މުދާ ޠާހިރުކުރުމާއި، މުޖުތަމަޢުގެ ފަގީރުންނާއި މުއްސަނދިންގެ ދެމެދުގައިވާ ތަފާތު ކުޑަކުރުމާއި، މުޖުތަމަޢުގެ ލާބައަށް މަސައްކަތްކުރުމުގެ މުހިންމުކަމާ ގުޅޭ މަޢުލޫމާތު ހިއްސާކުރެވުނެވެ.
ފޯރަމްގައި މަޢުލޫމާތު ދެއްވީ ޒަކާތު ހައުސްގެ ޕޮލިޓިކަލް ޑިރެކްޓަރ ޝައިޚް މުޙައްމަދު ނައުޝީރު އާއި ފަންޑު މެނޭޖަރ އަބްދުﷲ ޢަލީ އެވެ. މި ދެ ބޭފުޅުން، ޒަކާތު ހައުސްގެ މަސައްކަތްތަކާއި، ޒަކާތް އެންމެ ބޭނުންވާ ފަރާތްތަކަށް ފޯރުކޮށްދިނުމަށް ކުރެވޭ މަސައްކަތްތަކާ ބެހޭ މަޢުލޫމާތުވެސް ހިއްސާކުރެއްވިއެވެ.
ކުރިއަށް އޮތްތަނުގައި ދިވެހި ފުލުހުންގެ ޚިދުމަތާއި ޒަކާތު ހައުސް ގުޅިގެން އިތުރު ތަމްރީނު ޕްރޮގްރާމްތަކެއް ހިންގުމަށާއި، ކޮންމެ އަހަރަކު ޚާއްޞަ ލެކްޗަރ ސީރީޒެއް ބޭއްވުމަށް ވަނީ ރޭވިފައެވެ. މިގޮތުން، ފުލުހުންގެ މެދުގައި އިސްލާމީ މާލީ ޒިންމާތަކާ ބެހޭ ހޭލުންތެރިކަން އިތުރުކުރުމަށް މަސައްކަތް ކުރެވޭނެއެވެ.
