އަދަދު ނޫހުގެ ސީއީއޯ ހުސެއިން ފިޔާޒް މޫސާއަށް އެއްވެސް އިރެއްގައި އިންޒާރު ދެއްވާފައިނުވާކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މިކަން ރައީސް ހާމަކުރެއްވީ ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ.
ރައީސް މުއިއްޒު ވިދާޅުވި ގޮތުގައި، އެމަނިކުފާނު އަދަދު ނޫހުގެ ސީއީއޯ ހުސެއިން ފިޔާޒަށް ގުޅުއްވި ނަމަވެސް، އެއްވެސް ހާލެއްގައި އިންޒާރެއް ދެއްވާފައި ނުވާ ކަމަށެވެ. "ފިޔާޒަކީ ކުރިންވެސް ދަންނަ ބޭފުޅަކަށްވާތީ އަޅުގަނޑު ގުޅާލިން، އެކަމަކު އެއްވެސް އިންޒާރެއް ނުދެން،" ރައީސް ވިދާޅުވިއެވެ.
އިތުރަށް ރައީސް ހާމަކުރެއްވި ގޮތުގައި، އެ ކޯލުގައި އެމަނިކުފާނުގެ އާއިލާއާ ބެހޭ ގޮތުން ހަގީގަތެއްނެތް ދޮގު ވާހަކަ ނުފެތުރުމަށް އެދިވަޑައިގަތް ކަމަށެވެ. ނަމަވެސް އެއްވެސް ބާވަތެއްގެ އިންޒާރެއްގެ ވާހަކައެއް ދެކެވިފައި ނުވާ ކަމަށް ރައީސް މުއިއްޒު އިތުރަށް ހާމަކުރެއްވިއެވެ.
