ކައުންސިލުގެ ރައީސް ވިދާޅުވި ގޮތުގައި، މޫސުމަށް އަންނަ ބަދަލުތަކާ ގުޅިގެން ރަށުގެ ގޮނޑުދޮށް ގިރުމުގެ މައްސަލަ އިތުރުވެފައިވާ ކަމަށާއި، މިކަމަށް ދާއިމީ ހައްލެއް ހޯދުމަކީ ވަރަށް މުހިންމު ކަމެއް ކަމުގައި ފާހަގަކުރެއްވިއެވެ. އަދި މި މަޝްރޫޢުގެ ދަށުން ގޮނޑުދޮށް ހިމާޔަތްކުރުމަށް އެޅޭ ފިޔަވަޅުތަކުން ރަށުގެ ތިމާވެށި ރައްކާތެރިކޮށް، ރައްޔިތުންގެ ދިރިއުޅުމަށް ކުރިމަތިވެފައިވާ ނުރައްކާ ކުޑަކުރެވޭނެ ކަމަށް އުންމީދުކުރައްވާ ކަމަށް ވިދާޅުވިއެވެ.
ބައްދަލުވުމުގައި ބައިވެރިވި ޖައިކާގެ މަންދޫބު ވިދާޅުވި ގޮތުގައި، މި މަޝްރޫޢުގެ ދަށުން ކުރެވޭ ދިރާސާތަކުގެ އަލީގައި، ދިގު މުއްދަތަކަށް ދެމިގެންދާނެ ހައްލުތަކެއް ހޯދުމަށް މަސައްކަތްކުރެވޭނެއެވެ. އަދި މި މަސައްކަތުގައި ރަށުގެ ރައްޔިތުންގެ ބައިވެރިވުން ވަރަށް މުހިންމު ކަމަށްވެސް އޭނާ ފާހަގަކުރެއްވިއެވެ. އަދި މި މަސައްކަތްތަކުގެ ކުރިއެރުންތައް ރައްޔިތުންނާ ހިއްސާކުރަމުން ގެންދާނެ ކަމަށްވެސް ކައުންސިލުން ބުނެފައިވެއެވެ.
